"Ndoshta një ditë më shikon në kronikat e zeza"/ Si u rikthye në vëmendje videoja e autorit të dyshuar të vrasjes në Korçë me këngën fatale në sfond

TIRANË- Një video e vjetër e publikuar në rrjetet sociale është rikthyer në vëmendje pas vrasjes së 20-vjeçarit Joan Zuko në Korçë, ngjarje për të cilën Kristjan Sterjo u arrestua si autor i dyshuar.

Në pamjet e publikuara më herët, Sterjo shfaqet duke dalë nga një institucioni i sigurisë pas një arrestimi të mëparshëm për plagosje me thikë, ndërsa miqtë e tij e prisnin jashtë duke e filmuar me telefon.

Ajo që ka tërhequr më shumë vëmendje dhe ka habitur publikun është fakti se në sfondin e videos dëgjohet një këngë me vargjet profetike, “Ndoshta një ditë më shikon në kronikat e zeza.” Pamjet dhe fotot nga përditshmëria e tyre u shpërndanë gjerësisht në profilet sociale të rrethit të tij shoqëror, duke dokumentuar momentin e daljes nga institucioni i sigurisë.

Megjithatë, situata ka marrë një kthesë tragjike pas ngjarjes së rëndë të regjistruar mbrëmjen e së shtunës. Kristjan Sterjo u vu në pranga nga Policia vetëm pak orë pasi u identifikua si personi i dyshuar kryesor për vrasjen e të riut Joan Zuko.

Sipas të dhënave paraprake të grupit hetimor, krimi dyshohet se ka ndodhur si pasojë e një konflikti të mëparshëm mes dy të rinjve, i cili degradoi në përdorimin e dhunës fatale. Autoritetet kompetente po vijojnë hetimet intensive për të zbardhur plotësisht rrethanat dhe motivin e vërtetë që çuan në këtë ngjarje të rëndë që tronditi qytetin e Korçës.