Rritja e numrit të turistëve gjatë sezonit veror është shoqëruar edhe me shqetësime për abuzimet me çmimet n&eu...
AKTUALITET
Nga 1 korriku nis dhënia e kompensimit të TVSH-së për fermerët
PiranjatPërditësimi i fundit 30 Prill 2026, 13:52
Ministri i Financave Petrit Malaj në një dalje për mediat njoftoi se nga 1 korriku 2026 do të nisë dhënia e kompensimit të TVSH për fermerët.
Ministri Malaj tha se sipas vlerësimeve paraprake mbështetur mes vlerës së transaksioneve të autofaturave të lëshuara për fermerët nga grumbulluesit dhe përpunuesit llogaritet se vlera e kompesimit për 3-mujorin 2026 arrin në 400 mln lekë.
“Kompensimi për TVSH në bujqësi do të nisë nga 1 korriku 2026. Administrata tatimore është duke bërë një vlerësim të impaktit që ka politika e re e ndërmarrë.
Për 3 mujorin 2026 vërehet se kemi një rritje të transaksioneve midis fermerëve me NIPT dhe grumbulluesve dhe përpunuesve me 20%.
Është 5,642 numri i fermerëve në transaksioni me blerësit me TVSH. Ndërsa numri i blerësve me TVSH që kanë bërë transaksioni me fermerët është 448 apo 16 % më shumë sesa 3 mujori i 2025.
Në total numri i fermerëve të pajisur me NIPT është 113,470.
Rreth 400 mln lekë është shuma potenciale për rimbursim për 3 mujorin e 2026.
Ju bëj thirrje përpunuesve dhe grumbulluesve të lëshojnë autofatura te fermerët”, tha Malaj.
Nga 1 janari 2026 ka hyrë në fuqi skema e re e kompensimit të TVSH-së për fermerët, e cila parashikon përfitimin e një kompensimi 10% për prodhimet bujqësore të shitura tek grumbulluesit, përpunuesit ose agroturizmet e certifikuara.
Sipas ndryshimeve ligjore, baza e kompensimit do të jetë autofatura e lëshuar nga subjekti blerës, mbi të cilën llogaritet 10% që i kthehet fermerit.
Qëllimi i kësaj skeme është të rimbursojë TVSH-në 10% që fermeri ka paguar për inputet bujqësore, si plehrat kimike, farat dhe fidanët, duke ulur kostot e prodhimit dhe duke nxitur formalizimin e transaksioneve në sektor.
Prej vitit 2019 deri në dhjetor 2021 TVSH-ja për inputet bujqësore ka qenë zero. Nga 1 janari 2022 pas miratimit të ndryshimeve fiskale hyri në fuqi vendosja e TVSH-së 10% te çmimet e inputeve bujqësore.
Si do bëhet kompensimi i fermerëve përmes autofaturës
Për të përfituar kompensimin fermeri ai që do të bëjë kërkesën duhet të dorëzojë edhe faturat e lëshuara nga blerësi, pra autofaturat në të cilat të jetë i shënuar edhe NIPTI i fermerit, si dhe numrin e llogarisë së tij bankare.
Administrata tatimore ka sqaruar se kërkesa për kompensim do të paraqite brenda datës 31 Dhjetor, për furnizimet e kryera gjatë periudhës Janar-Qershor të vitit përkatës. Brenda datës 30
Qershor të vitit pasardhës, për furnizimet e kryera gjatë periudhës Korrik-Dhjetor të vitit paraardhës.
Kërkesa do të dërgohet në rrugë postare ose në rrugë elektronike. Administrata tatimore kryen kompensimin brenda 30 ditëve nga data e paraqitjes së kërkesës.
Ndërkohë fermeri për përfituar kompensimin, së pari fermeri duhet të jetë i pajisur me numër identifikimi (NIPT) nga Administrata Tatimore, pa pasur detyrim për deklarim periodik të TVSH-së.
Qarkullimi vjetor nuk duhet të tejkalojë kufirin minimal të regjistrimit për TVSH;
Në total, efekti financiar në vitin e parë të zbatimit llogaritet rreth 1.5 mld lekë. / Monitor
