Një kontroll policor në banesën e një pensionisteje në Shën Petersburg ka përfunduar me një zbulim të pazakontë...
AKTUALITET
Nga TikTok-u te “gara e vdekjes”, si humbën jetën 3 të rinjtë shqiptarë në Greqi
PiranjatPërditësimi i fundit 18 Shtator 2026, 20:23
Detaje të reja kanë dalë në dritë për aksidentin e rëndë të ndodhur në Glyfada të Athinës, ku humbën jetën tre të rinj shqiptarë, ndërsa dy të tjerë mbetën të plagosur.
Aksidenti ndodhi rreth orës 02:00 të së enjtes, 17 shtator, në kryqëzimin e bulevardit Poseidonos me rrugën Kalypsous, në drejtim të Pireut. Në automjet ndodheshin pesë të rinj kur drejtuesi humbi kontrollin, makina doli nga rruga, goditi barrierat dhe më pas u përplas me murin rrethues të një hoteli.
Përplasja ishte aq e fortë sa automjeti u shkatërrua pothuajse plotësisht. Motori u shkëput nga makina dhe përfundoi dhjetëra metra larg, ndërsa pjesë të automjetit u shpërndanë në një rreze prej rreth 30 metrash. Një dëshmitar që ndodhej në hotel tha se fillimisht dëgjoi frenimin dhe menjëherë më pas zhurmën e fuqishme të përplasjes. Kur doli në ballkon, pa tym, pluhur dhe motorin e shkëputur të automjetit në flakë.
Të dhënat që po shqyrtojnë autoritetet tregojnë se makina mund të ketë lëvizur me më shumë se 150 kilometra në orë pak përpara përplasjes. Hetuesit po analizojnë gjithashtu gjendjen e automjetit, pasi sipas informacioneve të publikuara në Greqi, makina ishte e modifikuar dhe e ulur, karakteristika që po shqyrtohen në kuadër të dyshimeve për gara të paligjshme.
Një nga pistat kryesore të hetimit është pikërisht mundësia që të rinjtë të kishin nisur një garë me një automjet tjetër. Autoritetet po kërkojnë të përcaktojnë nëse një makinë e dytë ndodhej pranë tyre në momentet para aksidentit dhe nëse shpejtësia e lartë lidhej me një garë të improvizuar.
Një tjetër element që po hetohet është TikTok-u. Mediat greke raportojnë se pesë të rinjtë mund të kenë qenë duke transmetuar live nga makina gjatë udhëtimit. Hetuesit po shqyrtojnë materialet dixhitale për të përcaktuar nëse transmetimi po zhvillohej në momentin e aksidentit dhe nëse në pamje mund të gjenden të dhëna për automjetin tjetër apo për shpejtësinë me të cilën po lëviznin.
Pas aksidentit, në vendngjarje mbërritën tetë zjarrfikës me tre automjete dhe një mjet të posaçëm shpëtimi. Dy prej të rinjve mbetën të bllokuar në automjet dhe u desh ndërhyrja e zjarrfikësve për nxjerrjen e tyre. Ambulancat i transportuan të pestë në spitalin Asklepieio të Voulës.
Për dy prej të rinjve mjekët nuk mundën të bënin asgjë. Një i tretë u dërgua me urgjencë në sallën e operacionit, por pësoi disa arrestime kardiake dhe më pas ndërroi jetë. Dy të mbijetuarit u transferuan në Spitalin e Përgjithshëm të Nikesë. Njëri prej tyre ndodhet i intubuar në terapi intensive, ndërsa autoritetet dhe mjekët vijojnë të monitorojnë gjendjen e tyre.
Policia greke po përpiqet tani të rindërtojë sekondat e fundit përpara përplasjes. Shpejtësia e automjetit, mundësia e një gare me një makinë tjetër, modifikimet e mjetit dhe informacionet për transmetimin live në TikTok janë elementet kryesore të hetimit që pritet të përcaktojë shkakun e aksidentit.
