DASHI Ka ende disa tensione në punë që po ju pengojnë të çoni përpara projektet ashtu siç dëshironi. Nuk ju m...
AKTUALITET
Para nisjes së shkollave, Hita zbret në Korçë/ Ja porositë për policinë vendore
PiranjatPërditësimi i fundit 9 Shtator 2026, 08:50
Pak ditë para nisjes së vitit të ri shkollor, Drejtori i Përgjithshëm i Policisë së Shtetit, Skënder Hita, zhvilloi një takim me drejtuesit e Policisë në Korçë. Në qendër të diskutimeve ishte siguria në shkolla, parandalimi i kriminalitetit dhe puna e strukturave vendore për rritjen e rendit dhe sigurisë.
Hita u ndal në Korçë në kuadër të takimeve që po zhvillon me strukturat vendore të Policisë në qarqe të ndryshme të vendit.
Takimi u zhvillua me drejtuesit e Drejtorisë Vendore të Policisë, shefat e komisariateve dhe drejtuesit e sektorëve.
Mbledhja zgjati rreth një orë dhe gjatë saj u diskutuan disa prej problematikave që lidhen me rendin dhe sigurinë në qark.
Një nga çështjet kryesore është siguria në shkolla, në prag të nisjes së vitit të ri shkollor. Policia pritet të ketë një rol të shtuar në parandalimin e konflikteve dhe incidenteve pranë ambienteve shkollore.
Në fokus është edhe lufta kundër drogës dhe armëve, identifikimi i personave që mund të përbëjnë rrezik për rendin publik dhe reagimi në kohë ndaj problematikave të evidentuara nga strukturat vendore.
Hita ka kërkuar gjithashtu rritjen e parametrave të sigurisë dhe një reagim më të shpejtë ndaj konflikteve dhe denoncimeve të qytetarëve.
Në takimet me strukturat vendore, pjesë e udhëzimeve ka qenë edhe kapja e personave në kërkim dhe parandalimi i veprimtarive kriminale.
Vizita në Korçë vjen në një moment kur Policia e Shtetit po zhvillon takime në qarqe të ndryshme, me synim përcaktimin e prioriteteve për strukturat vendore.
Më herët, Hita zhvilloi takime edhe në Elbasan, Berat dhe Kukës, ku siguria në shkolla, parandalimi i krimit, lufta kundër drogës dhe armëve ishin ndër çështjet kryesore të ngritura për policinë vendore.
Në Korçë, fokusi kryesor në prag të nisjes së shkollave mbetet forcimi i masave parandaluese dhe garantimi i një mjedisi më të sigurt për nxënësit, mësuesit dhe familjet.
