“Parodi” me dorëheqje në KLP! Anëtarët kërkojnë largimin e njëri-tjetrit, rrezikohen afatet për kryeprokurorin

Këshilli i Lartë i Prokurorisë nuk i ka përcjellë ende për verifikim formularët e vetëdeklarimit të pasurive të pesë kandidatëve për Prokuror të Përgjithshëm, duke i lidhur duart ILDKPI-së për të kontrolluar pasuritë e tyre.

Nën tensione, akuza ndaj njëri-tjetrit, anëtarët e KLP kishin në rend dite një çështje tjetër që ka marrë shkas nga kërkesa e kandidatit Ylli Pjetërnika, i cili kërkon dorëheqjen nga procesi për postin e Prokurorit të Përgjithshëm të anëtarit Vatë Staka.

Ky i fundit ka kërkuar dorëheqjen e anëtarit tjetër Zeqir Hoda, i cili ka kërkuar dorëheqjen e Sokol Stojanit, por edhe ai ka kërkuar dorëheqjen e kryetares së KLP, Mirela Bogdanit.

Për ata që ende nuk është kërkuar ende dorëheqja, kjo situatë po rrezikon afatet për të pasur një proces të rregullt për zgjedhjen e kryeprokurorit. Drejtimin e mbledhjes e mori anëtari tjetër Erind Gërmenji, që ishte relator i çështjes, por kur pa se kuorumi i votave nuk u bë, ai njoftoi mbledhjen e radhës që sërish pritet të jetë një parodi.