16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
Pas aktivistëve, mbyllen llogaritë e disa mediave në rrjetet sociale
PiranjatPërditësimi i fundit 5 September 2026, 21:04
Pas sulmit të rreth 200 llogarive në Instagram kryesisht të profileve që kanë mbështetur protestën e “Revolucionit të Flamingove”, së fundmi pre e sulmeve ka rënë edhe faqja e Citizens.al, në rrjetin social Facebook.
Sipas reagimit të vetë medias, faqja në Facebook u mbyll pa asnjë njoftim paraprak. “Ky nuk është sulmi i parë ndaj nesh, po punojmë për ta rikthyer. Faleminderit që na ndiqni që nga viti 2018”, thuhet në reagim.
Gjithashtu më herët, pre e sulmit ka rënë edhe faqja në Instagram e tv EuroNews Albania.
Sipas reagimit, pa asnjë njoftim, pa asnjë masë, sot faqja e Euronews Albania u zgjua me njoftimin ‘user not found’.
Mbrëmjen e kaluar, Euronews Albania kishte të ftuar në emisionin “Review” eurodeputetin Sandro Gozi, i cili foli pikërisht për mbylljen e llogarive shqiptare në Instagram dhe kërkoi transparencë nga Meta.
Gozi ngriti pyetjen: çfarë po ndodh dhe përse po mbyllen këto llogari?
Eurodeputeti kërkoi që Meta të japë një përgjigje të qartë nëse kemi të bëjmë me probleme teknike, shkelje të rregullave të platformës apo abuzim të koordinuar me sistemin e raportimeve. Më pak se 24 orë pas kësaj interviste, vetë Euronews Albania nuk e ka më të aksesueshme faqen e saj në Instagram.
Duke reaguar për situatën, Asociacioni i Gazetarëve të Shqipërisë, shprehu shqetësimin për atë që po ndodhet me hapësirat digjitale të mediave. “Mbyllja e njëpasnjëshme e faqeve të mediave, në një periudhë kur janë raportuar probleme me qindra llogari shqiptare, nuk mund të trajtohet më si një incident i izoluar apo vetëm si një çështje teknike”, thuhet në reagim.
Reagimi i plotë i AGSH:
Reagim i Asociacionit të Gazetarëve të Shqipërisë (AGSH)
Asociacioni i Gazetarëve të Shqipërisë (AGSH) shpreh shqetësim për mbylljen e faqes në Facebook të medias së pavarur Citizens.al, vetëm pak kohë pasi faqja zyrtare e Euronews Albania në Instagram u bë e paaksesueshme.
Citizens.al është një media e cila, ndër të tjera, ka raportuar në mënyrë të vazhdueshme zhvillimet e protestave të “Revolucionit të Flamingove”. Mbyllja e faqes së saj, pa një shpjegim publik dhe transparent, shton dyshimet dhe shqetësimet për mënyrën se si po zbatohen mekanizmat e moderimit dhe raportimit në platformat e kompanisë Meta.
Mbyllja e njëpasnjëshme e faqeve të mediave, në një periudhë kur janë raportuar probleme me qindra llogari shqiptare, nuk mund të trajtohet më si një incident i izoluar apo vetëm si një çështje teknike.
Kufizimi i aksesit të mediave në kanalet kryesore të komunikimit me publikun cenon shpërndarjen e informacionit dhe ngre shqetësime serioze për lirinë e medias.
