Përdorimi i telefonit në timon "fundos" shoferët, mbi 12 mijë gjoba në Tiranë gjatë javës

Mbi 12 mijë shkelje të rregullave të qarkullimit rrugor janë evidentuar në Tiranë gjatë javës së fundit, ndërsa 1 562 drejtues mjetesh janë ndëshkuar për përdorimin e celularit gjatë drejtimit të automjetit, mosvendosjen e rripit të sigurimit ose lëvizjen me motomjet pa kaskë mbrojtëse.

Sipas bilancit të Policisë Rrugore të Tiranës, gjatë kontrolleve të zhvilluara në akset kryesore dhe rrugët me qarkullim të lartë janë konstatuar 12 505 shkelje të Kodit Rrugor.

Po ashtu, janë evidentuar 24 raste të veprave penale në fushën e qarkullimit rrugor, autorët e të cilave janë arrestuar ose proceduar penalisht.

Gjatë kontrolleve janë vendosur gjithashtu 74 masa administrative për mospozicionim të rregullt në karrexhatë, ndërsa 12 drejtues mjetesh janë ndëshkuar pasi u konstatuan duke drejtuar automjetin nën efektin e alkoolit.

Në kuadër të aksionit, Policia ka larguar me karrotrec edhe 31 automjete të ndaluara ose të parkuara në kundërshtim me parashikimet e Kodit Rrugor.

Policia Rrugore apelon ndaj të gjithë drejtuesve të mjeteve të respektojnë rregullat e qarkullimit, të mos përdorin celularin gjatë drejtimit, të vendosin rripin e sigurimit, të mbajnë kaskën mbrojtëse në motomjete dhe të mos drejtojnë automjetin nën efektin e alkoolit apo pa leje drejtimi.