Përfundon tubimi para Kryeministrisë, protestuesit nisin marshimin rrugëve të Tiranës

Pas përfundimit të fjalimeve para godinës së Kryeministrisë, protestuesit kanë nisur marshimin e përnatshëm në rrugët e Tiranës, në kuadër të protestës së 60-të kundër qeverisë.

Të organizuar pas tubimit, qytetarët u larguan nga bulevardi "Dëshmorët e Kombit" për të vijuar marshimin në itinerarin e zakonshëm në disa prej akseve kryesore të kryeqytetit. Gjatë marshimit, protestuesit kanë përsëritur thirrjet "Rama ik", "Dorëheqje", "Shqipëri e re" dhe "Revolucion", duke ritheksuar se mobilizimi i tyre do të vazhdojë deri në largimin e kryeministrit Edi Rama dhe përmbushjen e kërkesave që kanë paraqitur.

Vlen të theksohet se protesta vijon edhe pas prezantimit të platformës "Besa", nga ana e kryeministrit Edi Rama, e cila sipas tij, synojnë të krijojnë një komunikim më të drejtpërdrejtë me qytetarët. Protestuesit janë shprehur se nuk i konsiderojnë të mjaftueshme deklaratat e kryeministrit dhe se nuk presin platforma apo iniciativa të reja nga qeveria.

Sipas tyre, protesta ka kaluar prej kohësh fazën e kërkesave sektoriale. Ata këmbëngulin se objekti i tubimeve nuk është më marrja e premtimeve apo angazhimeve politike, por largimi i Edi Ramës nga drejtimi i qeverisë.