Përkeqësohet zjarri në Fier! Flakët përhapen drejt një lokali, pritet ndërhyrje nga ajri

Situata nga zjarri në fshatin Drizë të bashkisë Fier është përkeqësuar, pasi flakët që përfshinë një sipërfaqe me ullishte po përhapen me shpejtësi, të favorizuara nga era e fortë. Sipas raportimeve, zjarri po avancon drejt një lokali pranë zonës, ndërsa forcat zjarrfikëse të Fierit, Roskovecit, Patosit dhe Albpetrolit vijojnë punën intensive për ta vënë nën kontroll.

Mësohet se, operacionit u janë bashkuar edhe banorët e zonës, të cilët po ndihmojnë me mjete rrethanore në izolimin e vatrës së zjarrit. Edhe pse flakët ndodhen larg qendrës së banuar, terreni i vështirë dhe mungesa e rrugëve hyrëse në parcelat me ullinj po e bëjnë ndërhyrjen më të vështirë.

Ndërkohë, autoritetet bëjnë me dije se pritet ndërhyrja nga ajri për të mbështetur operacionin e shuarjes së zjarrit dhe për të parandaluar përhapjen e mëtejshme të flakëve.