16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
Përplasja e qeverisë me magjistratët për pagat, Xama: Asnjë nga palët që janë në konflikt nuk respekton ligjet
PiranjatPërditësimi i fundit 8 September 2026, 12:49
Gazetarja Ola Xama ka reaguar lidhur me përplasjen e qeverisë me magjistratët, për pagat e këtyre të fundit, ku ka sqaruar se asnjë nga palët që janë në konflikt nuk respekton ligjet. Me anë të një reagimi në rrjetet sociale, Xama thotë se fillimisht është qeveria që nuk ka zbatuar vendimin e Gjykatës Kushtetuese i cili detyronte Kuvendin të bënte ndryshimet ligjore për mënyrën e përllogaritjes së pagës brenda datë 31 korrik të këtij viti.
Ajo thekson më tej se administrata e thesarit nuk mund të ekzekutojë fonde shtesë nëse ato nuk janë të parashikuara dhe të disponueshme në llogarinë ekonomike. Sipas saj, thesari nuk mund të ekzekutojë një urdhër-shpenzim me vlerë më të lartë pa fondet përkatëse, pasi një veprim i tillë do të binte ndesh me rregullat buxhetore dhe mund të krijonte edhe detyrime të prapambetura.
Gazetarja kritikon edhe institucionet e drejtësisë që kërkojnë ekzekutimin e pagave pa pasur fondet përkatëse në dispozicion. Në fund, Xama shton se përgjegjësia kryesore për situatën mbetet te qeveria për moszbatimin e vendimit të Gjykatës Kushtetuese. Megjithatë, ajo nënvizon se shkelja e një ligji nuk mund të kundërshtohet përmes një tjetër shkeljeje ligjore.
Përplasja për pagat e gjyqtarëve dhe prokurorëve konfirmon se asnjë nga palët që janë në konflikt nuk respekton ligjet. Fillimisht është qeveria që nuk ka zbatuar vendimin e Gjykatës Kushtetuese i cili detyronte Kuvendin të bënte ndryshimet ligjore për mënyrën e përllogaritjes së pagës brenda datë 31 korrik të këtij viti.
Dukshëm ky vendim nuk është zbatuar dhe është një shkelje nga ana e autoriteteve përgjegjëse. Shkelja mund të jetë e Ministrit të Financave i cili ka detyrimin për t’i propozuar Këshillit të Ministrave projektligje të karakterit financiar, Sekretarit të Përgjithshëm të Këshillit të Ministrave nëse akti është depozituar por nuk i është paraqitur brenda afateve Këshillit të Ministrave, ose Këshillit të Ministrave që nuk e ka miratuar nëse i është paraqitur.
Nga ana tjetër, që administrata e thesarit të kalojë fondet përkatëse në një llogari financiare do të duhet që paratë të gjenden në llogarinë ekonomike. Nëse ligji “Për statusin e gjyqtarëve dhe prokurorëve në Republikën e Shqipërisë” nuk është ndryshuar dhe nuk ka prodhuar efekte financiare, Ministria e Financave dhe Drejtoria e Buxhetit nuk ka si të reflektojë në buxhet ndryshimet përkatëse, pasi do të shkelte Ligjin për Menaxhimin e Sistemit Buxhetor. Në rastin në fjalë, thesari nuk ka si ekzekuton një urdhër-shpenzimi me vlerë më të lartë sepse do të ishte në shkleje të ligjit dhe rregullave buxhetore, madje dhe të natyrës penale pasi do të krijonte detyrime të prapambetura.
Si titullari i një institucioni të drejtësisë (nëpunësi autorizues) edhe drejtori i financës i këtij institucioni (nëpunësi zbatues) që ka bërë kërkesën për derdhjen e pagave pa patur fonde në llogarinë ekonomike, praktikisht ndodhen në shkelje të ligjit. Patjetër që shkelja e parë është e qeverisë që nuk ka zbatuar një vendim të Gjykatës Kushtetuese, por shkleja e ligjit nuk luftohet duke shkelur ligjin. Në shoqëritë me demokraci të konsoliduar situata të tilla thjesht nuk ndodhin. Në rastin e Shqipërisë do të ishte më mirë që pala e prekur nga padrejtësitë e ekzekutivit të shkelë etikën dhe të protestojë - sesa të marrë vetë vendime në shkelje të ligjit!
