“Po derdhim djersën, por nuk paguhemi”/ Sportistët e klubit “Studenti” prej 4 muajsh pa paga: Bashkia Tiranë thotë s’ka fonde

Një sportist i klubit “Studenti” i është drejtuar redaksisë së Piranjat News, duke denoncuar se prej më shumë se katër muajsh ai dhe shumë sportistë të tjerë nuk kanë marrë pagat.

Sipas denoncuesit, kjo situatë prek një numër të madh sportistësh të klubit, të cilët, përveç vonesave, pretendojnë se edhe pagesat e kryera më herët nuk kanë qenë në përputhje me detyrimet ligjore.

“Prej mbi 3-4 muajsh nuk marrim pagat si sportistë. Ka edhe shumë sportistë të tjerë me të njëjtin shqetësim. Edhe ato paga që kemi marrë nuk janë bërë sipas ligjeve që vetë kanë firmosur. Përmes jush dua t’u bëj thirrje të gjithë sportistëve të jenë në protestë për djersën që po derdhim çdo ditë”, shprehet ai për Piranjat News. 

Denoncuesi thotë për Piranjat News se, gjatë një takimi me drejtuesit e klubit, sportistëve u është komunikuar se vonesa e pagesave lidhet me mungesën e fondeve nga Bashkia e Tiranës.

Sipas mesazhit që, sipas denoncuesit, u është përcjellë nga drejtuesit, “për shkak të mungesës së fondeve dhe faktit që buxheti financiar ende nuk është çelur nga Bashkia e Tiranës, nuk do të kryhen pagesat për trajnerët dhe sportistët deri në çeljen e fondit”.

Sportistët kërkojnë zgjidhje të menjëhershme të situatës dhe shlyerjen e pagave të prapambetura, ndërsa paralajmërojnë se do të vijojnë reagimet e tyre deri në marrjen e një përgjigjeje konkrete nga institucionet përgjegjëse./Piranjat News