Ç’po ndodh te Liqeni Artificial i Tiranës? Ujë i ndotur dhe peshq të ngordhur mbi sipërfaqe

Pamje të filmuara me dron në Liqenin Artificial të Tiranës kanë sjellë në vëmendje gjendjen e ujit dhe praninë e peshqve të ngordhur në sipërfaqe.

Denoncimi i publikuar, tregon ujë me ngjyrë të gjelbër të errët dhe zona ku duken shtresa algash. Në një moment shihet edhe një peshk i ngordhur që lundron në sipërfaqe. Qytetari tregon se po shëtiste me familjen kur vendosi të filmonte liqenin nga ajri, por pamjet që pa e shqetësuan.

“Kjo është një video e paradites së sotme nga liqeni. Po bëja shëtitje me familjen dhe mendova të filmoja diçka nga lart, por pamjet ishin vërtet të trishtueshme. Mu duk si vend grumbullimi i ujërave të zeza,- deklaron qytetari duke ngritur shqetësimin për ndotjen e liqenit.

Nga pamjet nuk mund të përcaktohet shkaku i ngjyrës së ujit apo i ngordhjes së peshkut dhe nuk mund të konfirmohet nëse bëhet fjalë për ndotje nga ujërat e zeza, ndërsa deri më tani nuk ka një reagim nga instancat përkatëse.