Protesta e 93-të para Kryeministrisë është shoqëruar me thirrje për përshkallëzim të aksionit qytetar dhe paralajm&...
AKTUALITET
Po shkonte të vriste personat që i dhunuan nipin? Zbardhet dëshmia e Nelës: Armën do e hidhja në përrua
PiranjatPërditësimi i fundit 31 Gusht 2026, 18:25
47-vjeçari Melison Nela, i cili u kap nga policia 3 ditë më parë teksa në makinë mbante një armë automatike “AK-47” me 84 fishekë, ka dhënë një version krejt të kundërt për ngjarjen e raportuar nga policia e Kavajës, se ai do vriste Florin Habilaj, Arbër Habilaj dhe Enolt Dragotin.
Gazetari Elton Qyno ka mundur të sigurojë dëshminë e 47-vjeçarit të dhënë para policisë dhe gjykatës, por pretendimi i tij se po shkonte të hidhte automatikun në një përrua, nuk e ka shpëtuar Melison Nelën nga burgu.
Ai tashmë akuzohet për “Mbajtje pa lejë të armëve dhe municioneve” dhe ndaj tij ditën e sotme gjykatësi i Durrësit, Elvis Sulejmani, caktoi masën e sigurisë “Arrest në burg”.
Në rrëfimin që Nela ka dhënë në polici dhe gjykatë,ai ka shpjeguar se nuk ka pasur asnjëherë në plan të vriste dy vëllezërit, pasi ndaj tyre 1 ditë para se të arrestohej nga policia, ai kishte bërë kallëzim penal lidhur me situatën e dhunimit të nipit.
Nela, ka dhënë një version për të dalë nga situata e kapjes në flagrancë dhe qëllimi për të vrarë dy vëllezërit Habilaj, duke treguar se ishte ndaluar nga policia në një moment kur ai po shkonte të hidhte armën dhe 3 karikatoret në përroin e “Leshniqës” në Kavajë.
“...duke mos u njohur mirë ligjin, pata frikë për pasojat që mund të kisha dhe pa e menduar, u nisa për ta hedhur armën në përrua...”-ka deklaruar Melison Nela.
Më poshtë jepet i plotë rrëfimi i tij ku ai sqaron situatën pas kapjes nga ana e policisë së Kavajës.
Përgjigje: Dua të jap shpjegime në prezencë të avokatit tim, ku deklaroj se përsa i përket armës së gjetur sot më 28 Gusht 2026 në automjetin tim, tip “Golf 4” me targë AA093ID, rreth orës 18:30, isha duke lëvizur në rrugën “Josif Buda” për në drejtim të përroit të “Leshniqes”, Kavajë, ku do të hidhja armën tip “Kallashnikov”, me 3 krëhëra, me fishekë pasi e kisha në shtëpi qysh prej vitit 1997.Këtë armë nuk doja ta mbaja më në ambjentet e baneses sime. Deklaroj se unë banoj i vetëm në banesë, pasi jam i divorcuar dhe familjarët jetojnë në Itali dhe kisha frikë se mos futej ndonjë person në banesë dhe e merrte armën e mësipërme.
Pyetje: Përse nuk lajmëruat shërbimet e policisë për të dorëzuar armën, me të cilën jeni kapur ditën e sotme në flagrancë?
Përgjigje: Duke mos u njohur mirë ligjin pata frikë për pasojat që mund të kisha dhe pa e menduar, u nisa për ta dërguar në përrua.
Pyetje: A keni patur konflikt me dikë gjatë kësaj kohe?
Përgjigje: Deklaroj se kam bërë një kallëzim ditën e djeshme pasi nipi im, ka patur një konflikt me disa shtetas për të cilën unë nuk kam lidhje.
Pyetje: Keni patur qëllim që të përdornit armën në lidhje me konfliktin që ka patur në datë 27 Gusht 2026, nipi juaj Gentian Nela me shtetasit Florin Habilaj, Arbër Habilaj dhe Enolt Dragoti?
Përgjigje: Absolutisht që jo. Madje ky ishte dhe një nga shkaqet që ta zhdukja si armë nga banesa ime. Nese do kisha qëllime të tilla do ta përdorja ditën e djeshme dhe jo të vija të bëja kallëzim në polici për konfliktin që kishte nipi.
Pyetje: Ku dhe kur e keni gjetur armën dhe municionin e mësipërm?
Përgjigje: Siç deklarova dhe më lart e kam patur në banesën time qysh prej vitit 1997.
Pyetje: Keni gjë tjetër për të deklaruar?
Përgjigje: Ndihem i penduar se nuk duhet ta kisha marrë armën aty./Syri
