Policia e Shtetit paralajmëron qytetarët: Kujdes nga mashtrimet online me SMS të rreme

Policia e Shtetit ka rikthyer edhe një herë vëmendjen e qytetarëve mbi rrezikun e shtuar të mashtrimeve online, të njohura si “phishing”, të cilat vijojnë të përhapen përmes mesazheve SMS dhe platformave të ndryshme digjitale.

Sipas njoftimit zyrtar, persona keqdashës po dërgojnë mesazhe në emër të institucioneve publike, si Posta Shqiptare apo platforma që imitojnë shërbimet e-Albania, duke pretenduar se qytetarët kanë pako për të tërhequr ose detyrime për të paguar.

Në këto mesazhe përfshihen linke të rreme, të cilat imitojnë faqe zyrtare dhe synojnë marrjen e të dhënave personale dhe bankare të qytetarëve. Autoritetet theksojnë se kjo skemë mashtrimi nuk është e izoluar, por e përhapur gjerësisht në nivel global.

Njoftimi i Policisë:

Kujdes nga mashtrimet online (phishing).

Policia e Shtetit njofton edhe një herë qytetarët mbi vijimin e rasteve të mashtrimeve online (phishing), ku persona keqdashës dërgojnë SMS të rreme në emër të institucioneve publike, përfshirë Postën Shqiptare apo platforma të ngjashme me e-Albania.

Në këto mesazhe pretendohet se qytetarët kanë pako për të tërhequr ose detyrime/gjoba për të paguar, duke i drejtuar në linke të rreme që imitojnë faqe zyrtare, me qëllim marrjen e të dhënave personale dhe bankare.

Theksojmë se kjo skemë mashtruese është e njëjtë dhe e përhapur thuajse në të gjithë botën dhe nuk përbën një fenomen të izoluar.

Për këtë arsye, me qëllim parandalimin dhe ndërgjegjësimin e qytetarëve, përsërisim këtë njoftim publik.

Kujdes:

Mos klikoni në linke të dyshimta të dërguara me SMS ose mesazhe të tjera.

Mos vendosni të dhëna personale apo bankare në faqe të paautorizuara.

Injoroni dhe fshini menjëherë mesazhe të tilla mashtruese.

Verifikoni gjithmonë informacionin vetëm në kanalet zyrtare të institucioneve.

Theksojmë se të dhënat personale dhe bankare nuk vidhen nëse nuk ndërveproni duke klikuar linket e dërguara dhe duke futur vetë të dhënat e tyre në faqet mashtruese.

Tregoni kujdes të shtuar dhe raportoni çdo rast të dyshimtë pranë organeve kompetente.