“Mos e prek Memaliajn!” Me këtë mesazh dhe pankarta në duar, banorë të Memaliajt dolën në aksin kryesor që l...
AKTUALITET
Policia godet rrjetin e shpërndarësve të kokainës me fitime rreth 100 mijë euro, mes të arrestuarve edhe dy vëllezër
PiranjatPërditësimi i fundit 11 Maj 2026, 18:12
Policia italiane arrestoi tre shtetas shqiptarë, dy të lindur në vitin 1990 dhe një në vitin 1999, të akuzuar si pjesë e një rrjeti të shpërndarjes së drogës në zonat e Imola dhe Ravenna.
Operacioni nisi pas informacioneve të siguruara nga Komisariati i Policisë së Imola, të cilat çuan në identifikimin e dy vëllezërve me origjinë shqiptare, të njohur më parë nga policia për vepra penale kundër personit dhe pasurisë, të përfshirë në një aktivitet të gjerë të shpërndarjes së drogës në zonën e Imolës.
Hetimet treguan se ata lëviznin çdo ditë me automjetet e tyre drejt pikave të caktuara në qytet, ku takonin blerësit, shumica persona me precedentë penalë dhe të njohur për policinë për çështje narkotikësh, të cilëve u shisnin drogë kundrejt parave.
Në disa raste, dy vëllezërit lëviznin edhe jashtë territorit të Imolës, duke kaluar në provincën e Ravenës, në komunën Massa Lombarda, ku gjithashtu u panë duke kryer shitje droge.
Shërbimet e mëvonshme të vëzhgimit dhe ndjekjes, të vështirësuara nga mënyra e shpejtë dhe e rrezikshme e drejtimit të automjeteve në rrugë dytësore dhe rurale, bënë të mundur zbulimin se të dy përdornin si pikënisje dhe kthimi një banesë në Lugo, e cila rezultoi të ishte vendbanimi i tyre. Për këtë arsye, me ndihmën e njësive speciale të Bolonjës dhe Ravenës, policia ndoqi dy vëllezërit.
Shqiptari i lindur në vitin 1999 u ndalua pranë një qendre tregtare në Faenza, ndërsa tjetri në komunën Bagnacavallo. Kontrolli personal ndaj tyre nuk zbuloi asgjë të paligjshme, ndryshe nga kontrolli në banesën e tyre në Lugo. Gjatë operacionit u sekuestruan gjithsej 366 gramë kokainë, 54 gramë marijuanë dhe 7.700 euro cash në kartëmonedha të prerjeve të ndryshme. Në përfundim të veprimeve, të dy u arrestuan për posedim droge me qëllim shpërndarjeje në bashkëpunim dhe u dërguan në burgun e Ravenës.
Njëkohësisht, hetuesit, kryen një kontroll në banesën e një tjetër shtetasi shqiptar 36-vjeçar, banues në Massa Lombarda, që çoi në arrestimin e tij. Burri kishte fshehur në vilën dhe në kopshtin e tij lloje të ndryshme droge dhe një pistoletë gati për përdorim.
Falë ndihmës së njësisë së qenve të Guardia di Finanza në Ravenë, u gjetën dhe u sekuestruan 1 kilogram e 300 gramë kokainë, 200 gramë marijuanë, 100 gramë hashash dhe katër peshore precisioni.
Pistoleta e kalibrit 6.35 u gjet bashkë me 50 fishekë të fshehur mes disa gomave në garazh, ndërsa në një dollap në shtëpi u gjetën mbi 10 mijë euro cash në prerje të ndryshme, që dyshohet se vinin nga aktiviteti i paligjshëm i të arrestuarit. Edhe ai u dërgua në burgun e Ravenës.
Sipas autoriteteve, droga e sekuestruar, nëse do të dilte në tregun e shpërndarjes, mund t’i sillte të arrestuarit mbi 100 mijë euro fitime. /PiranjatNews/
