Policia ka goditur një grup kriminal që shiste drogë pranë shkollave në Tiranë. Për 14 prej tyre është ekzekutuar...
AKTUALITET
Policia jep detaje zyrtare për aksidentin e rëndë të autobusit. Kush është shoferi 36-vjeçar që humbi jetën. Një fëmijë u ringjall në spital
PiranjatPërditësimi i fundit 30 Qershor 2026, 18:02
Policia e Shtetit ka saktësuar të dhënat mbi aksidentin e rëndë rrugor të ndodhur pasditen e kësaj të marte në autostradën Durrës–Tiranë, në segmentin Qafë Kashar–Casa Italia, ku një autobus pasagjerësh humbi kontrollin dhe u përmbys.
Ndryshe nga informacioni paraprak, ku u raportuan dy viktima dhe 15 të plagosur, autoritetet bëjnë me dije se bilanci i saktë është një viktimë dhe 12 të plagosur.
Sipas Policisë, viktima është drejtuesi i autobusit, shtetasi Redion Hasimja., 36 vjeç, banues në Kombinat, Tiranë.
Nga 12 pasagjerët e lënduar, 7 ndodhen në gjendje të rëndë shëndetësore, ndërsa 5 të tjerë kanë pësuar dëmtime të lehta dhe ndodhen jashtë rrezikut për jetën. Të gjithë po marrin trajtim në spital.
Njoftimi: Përditësim informacioni dhe saktësim i të dhënave për aksidentin e rëndë rrugor, të ndodhur rreth orës 15:00, në autostradën Durrës–Tiranë, në segmentin Qafë Kashar–Casa Italia. Në vijim të deklaratës për media të dhënë nga Drejtori i Policisë Rrugore, Drejtues i Parë Perlat Vatoci, në të cilën u deklarua se si pasojë e aksidentit kishin humbur jetën dy shtetas dhe 15 shtetas të tjerë po merrnin ndihmë mjekësore, pas saktësimit të informacionit rezulton se: Si pasojë e aksidentit ka humbur jetën një shtetas, konkretisht drejtuesi i autobusit, shtetasi R. H., 36 vjeç, banues në Kombinat, Tiranë. Gjithashtu, janë dëmtuar 12 shtetas, pasagjerë në autobus, dhe jo 15 shtetas. Nga të dëmtuarit, 7 shtetas janë në gjendje të rëndë, ndërsa 5 të tjerë kanë pësuar dëmtime të lehta dhe ndodhen jashtë rrezikut për jetën. Të gjithë të dëmtuarit po marrin ndihmën e nevojshme mjekësore. Konfuzioni në raportimin fillestar u krijua për shkak të situatës së rëndë në vendngjarje dhe transportimit të të dëmtuarve si në spitalin shtetëror, ashtu edhe në një spital privat. Një fëmijë, i cili mbërriti në spitalin privat pa shenja jete dhe fillimisht u raportua si viktimë, u rikthye në jetë nga ekipi mjekësor përmes procedurave të reanimimit. Më pas, fëmija është transportuar në Spitalin Ushtarak dhe ndodhet nën kujdes intensiv mjekësor. Ndërkohë, grupi i posaçëm hetimor, nën drejtimin e Prokurorisë, vijon veprimet në vendngjarje për përcaktimin e shkakut të aksidentit dhe dokumentimin e plotë ligjor të rastit.
