Zonat malore në qarkun e Kukësit po përjetojnë kushte klimaterike dimërore, ndonëse jemi ende në fund të muajit tetor.
...
AKTUALITET
Probleme të reja me e-Albania, bizneset nuk arrijnë të verifikojnë detyrimet e taksave vendore
PiranjatPërditësimi i fundit 1 June 2026, 13:59
Edhe në këtë fillim muaji, bizneset sërish janë përballur me probleme në funksionimin e platformës e-Albania, duke mos marrë shërbim për verifikimin dhe kryerjen e pagesave për detyrimet e taksave vendore.
Bizneset dhe kontabilistët kanë ngritur shqetësimin se gjatë orëve të para të mëngjesit, nuk kanë mundur të hapin shërbimin përkatës në platformë, çka ka penguar verifikimin e detyrimeve vendore.
Situata ka krijuar vështirësi veçanërisht për bizneset që kanë nevojë të kryejnë procedura administrative apo pagesa brenda afateve të përcaktuara.
Lidhur me problematikën Monitor kontaktoi Drejtorinë e Përgjithshme të Taksave dhe Tarifave Vendore që ka bërë me dije se vështirësitë lidhen me procesin e kalimit të e-Albania në versionin e ri të sistemit.
Sipas tyre, probleme të ngjashme nuk janë shfaqur vetëm në shërbimet e pushtetit vendor, por edhe në disa drejtori dhe institucione të tjera që ofrojnë shërbime përmes portalit e-Albania.
“Pas kalimit të e-Albania në variantin e ri, jo vetëm ne, por edhe disa drejtori të ndryshme kanë pasur probleme me shërbimet që ofrojnë në platformë. Aktualisht po punohet për rikthimin e shërbimit të marrjes së njoftimit të detyrimeve, ndërkohë që shërbimi i marrjes së vërtetimit funksionon normalisht”, bëjnë me dije burime nga taksat vendore.
Taksat vendore kanë ofruar një zgjidhje të përkohshme për qytetarët dhe bizneset që kanë nevojë urgjente për dokumentacionin. Sipas tyre bizneset e interesuara mund të dërgojnë kërkesën përmes postës elektronike dhe njoftimi i detyrimeve për taksat vendore do t’u përcillet menjëherë nga administrata.
Teksa mësohet se ekipet teknike janë duke punuar për zgjidhjen e problemit dhe pritet që shërbimi për marrjen e njoftimit të detyrimeve të rikthehet në funksion të plotë gjatë ditës së sotme.
Problemet me mosfunksionimin e platformës e-Albania janë raportuar edhe më herët gjatë ditëve të fundit, pas implementimit të ndryshimeve të teknologjisë në sistem.
Shumë binzese kanë ngritur shqetësime për vonesa apo mosfunksionim me hope të sistemit, duke kërkuar normalizimin sa më të shpejtë të situatës.
Agjencia Kombëtare për Shërbimin e Informacionit (AKSHI) vazhdimisht ndaj ankesave të bizneseve përsërit se sistemi është funksional./ Monitor
