Ministria e Drejtësisë ka reaguar lidhur me transferimin e Erion Veliajt nga ambientet e paraburgimit, duke sqaruar se lëvizja drejt Institucioni...
AKTUALITET
Problemet me sistemet e trafikut ajror sjellin vonesa në Rinas, preken fluturimet drejt disa qyteteve europiane
PiranjatPërditësimi i fundit 28 August 2026, 19:08
Problemi teknik që shkaktoi fikjen e sistemeve të trafikut ajror në Shqipëri ka sjellë pasoja në fluturimet nga Aeroporti Ndërkombëtar i Tiranës, ku një numër nisjesh drejt qyteteve europiane rezultojnë me vonesa.
Sipas ALBCONTROL, problemi teknik u regjistrua rreth orës 17:30, duke shkaktuar fikjen e sistemeve të menaxhimit të trafikut ajror. Ekspertët ndërhynë menjëherë, duke marrë masat e nevojshme për të shmangur çdo rrezik për avionët dhe duke nisur punën për rikthimin e sistemeve.
ALBCONTROL bëri të ditur se rreth orës 18:00 ishte rikthyer në funksion normal 90% e sistemeve, ndërsa puna vijonte për rikthimin e plotë të pjesës së mbetur.
Ndërprerja ka reflektuar ndërkohë në oraret e fluturimeve në Rinas.
Sipas të dhënave të publikuara për fluturimet, disa prej nisjeve të programuara pas orës 17:30 rezultojnë të vonuara.
Mes tyre është fluturimi i Ryanair drejt Bolonjës, i planifikuar për në orën 17:30, si dhe ai drejt Dortmundit i Wizz Air Malta, i parashikuar për në 17:50.
Me vonesë rezultojnë gjithashtu fluturimi i Transavia France drejt Paris Orly në orën 18:00 dhe ai i Ryanair drejt Düsseldorf Weeze, i programuar për në 18:10.
Situata ka prekur edhe nisjet e programuara në vijim drejt Milanos, Londrës, Athinës, Romës dhe Venecias, të cilat në sistem shfaqen me statusin “Delayed”.
Fluturimi drejt Milan Bergamos i planifikuar për në orën 17:30 rezulton ndërkohë i përfunduar.
Vonesat vijnë pas problemit teknik të regjistruar në sistemet e trafikut ajror, ndërsa rikthimi gradual i tyre pritet të mundësojë normalizimin e lëvizjeve.
Mbetet për t’u parë sa kohë do të nevojitet që trafiku ajror dhe oraret e fluturimeve në Aeroportin e Rinasit të rikthehen plotësisht në normalitet.
