16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
Protesta e 104-të, Kola thirrje për emigrantët e ndaluar në Mal të Zi: Lironi shqiptarët, Ramën nuk po e merr gjumi
PiranjatPërditësimi i fundit 11 September 2026, 20:47
Këtë të premte mbahet protesta e 104-të përpara Kryeministrisë, ndërsa aktivisti Arben Kola ka reaguar për ndalimin e shqiptarëve të diasporës që po udhëtojnë drejt Shqipërisë për t’iu bashkuar tubimit.
Ai bëri thirrje që mërgimtarët të lejohen të vijojnë rrugën, ndërsa paralajmëroi një marshim drejt Ambasadës së Malit të Zi në Tiranë.
Në prag të protestës, Kola deklaroi se pjesëtarë të mërgatës janë penguar të vijojnë udhëtimin drejt Shqipërisë, ndërsa pretendoi se pas situatës qëndron qeveria shqiptare.
“Dua të bëj një lajmërim, i cili ka të bëjë me ndalimin e mërgatës tonë për të qënë pranë nesh. I ka hyrë tmerri Ramës, rikthimi i 3-të i mërgatës ia ka prishur gjumin e natës, jo vetëm atij, por edhe qeveritarëve, e cila përmes instancave të Malit të Zi, është bërë pengesë dhe ka penguar atdhetarët tonë.
Kemi thirrje për ambasadën e Malit të Zi, e cila ndodhet në Tiranë. Të lirojë rrugën për qytetarët tanë. Një thirrje shkon edhe për ambasadat e tjera, që të ushtojnë presion, që ata me dy shtetësi, të lirohen sa më shpejt, në mënyrë që të na bashkohen nesër. Ftoj shqiptarët, sonte marshimi do jetë në drejtim të ambasadaës së Malit të Zi”, deklaroi Kola.
Aktivisti u bëri kështu thirrje përfaqësive diplomatike që të ndërhyjnë për zgjidhjen e situatës dhe lejimin e mërgimtarëve që të vazhdojnë udhëtimin drejt Shqipërisë.
Ndërkohë, ai njoftoi se protestuesit do të marshojnë drejt Ambasadës së Malit të Zi në Tiranë, në shenjë reagimi ndaj ndalimit të raportuar të shqiptarëve që po udhëtojnë për t’iu bashkuar protestës.
