Protestuesit kërkojnë hetim për policinë: Dhuna nuk mund të përdoret si mjet frikësimi

Protesta e 34-të qytetare para Kryeministrisë është shoqëruar me leximin e një deklarate, përmes së cilës organizatorët kanë dënuar ndërhyrjen e Policisë së Shtetit gjatë përplasjeve të një dite më parë para Kuvendit.

Deklarata u lexua nga aktivistja Sidorela Vatnikaj, e cila iu referua edhe shqetësimeve të ngritura nga Komiteti Shqiptar i Helsinkit lidhur me përdorimin e forcës nga policia.

"Protesta është e drejtë kushtetuese. Çdo përpjekje për ta frikësuar apo shtypur përbën shkelje të një të drejte themelore. Dënojmë përdorimin e gazit pa paralajmërim dhe shtyrjen e protestuesve. Monitorimi i Komitetit Shqiptar të Helsinkit ka konstatuar tejkalim të kompetencave të policisë," deklaroi Vatnikaj.

Në deklaratë, organizatorët i kërkuan Policisë së Shtetit të japë shpjegime për ndërhyrjen e djeshme dhe kërkuan zhvillimin e një hetimi të pavarur.

"I kërkojmë Policisë së Shtetit të japë shpjegime dhe të mundësojë një hetim të pavarur për tejkalimin e kompetencave. Çdo efektiv duhet të mbajë përgjegjësi. Dhuna e ushtruar ndaj një protestuesi në Zvërnec nuk ishte rast i izoluar, sepse edhe dje një grup protestuesish u përball me dhunë joproporcionale" u shpreh aktivistja.

Në fund të deklaratës, protestuesit kërkuan lirimin e menjëhershëm të qytetarëve të arrestuar gjatë protestës së djeshme.

"Kërkojmë lirimin e menjëhershëm të protestuesve. Ndalimet arbitrare dhe dhuna nuk mund të përdoren si mjet frikësimi" deklaroi Vatnikaj.

Deklarata u lexua në podiumin e protestës, ndërsa tubimi para Kryeministrisë vijon në ditën e 34-të me thirrje kundër qeverisë dhe kërkesa për lirimin e protestuesve të arrestuar.