KOSOVË- Aleanca ka shprehur mbështetjen e saj për çdo iniciativë ligjore dhe demokratike që synon garantimin e drejtësis&...
AKTUALITET
Punësimi në shtet rritet sërish për tremujorin e dytë, mbi 186 mijë kontribuues
PiranjatPërditësimi i fundit 21 Shtator 2026, 07:36
Numri i të punësuarve në sektorin shtetëror që paguajnë sigurime shoqërore arriti në 186.3 mijë sipas të dhënave për kontribuuesit në skemën e sigurimeve shoqërore, që u publikuan nga INSTAT.
Në krahasim me të njëjtën periudhë të një viti më parë, punësimi kontribuues në shtet u rrit lehtë me 608 persona, ose 0.3%, por mbetet pak më poshtë se rekordi historik prej 186.6 persona, që u arrit në tremujorin e katërt të 2025-s.
Të dhënat tregojnë se numri i të punësuarve në shtet ka ardhur në rritje në afat më të gjatë. Në fund të vitit 2018 numëroheshin rreth 172.9 mijë kontribuues në sektorin shtetëror, ndërsa në tremujorin e dytë të këtij viti numri ishte rreth 13.5 mijë persona më i lartë, ose me një rritje prej rreth 7.8%.
Rritje më të fortë vijon të shënojë sektori privat. Në tremujorin e dytë 2026, numri i të punësuarve kontribuues në sektorin privat arriti në rreth 590 mijë persona, me rritje 2.7% me bazë vjetore.
Në total, të punësuarit kontribuues në sigurimet shoqërore arritën në 776 mijë persona, me rritje 2.1% në krahasim me të njëjtën periudhë të një viti më parë (+16.2 mijë persona).
Në strukturën e përgjithshme, sektori privat përfaqëson rreth 76% të të punësuarve kontribuues, ndërsa sektori shtetëror rreth 24%.
Rritja e numrit të të punësuarve në sektorin shtetëror bëhet më e diskutueshme kur shihet përballë zhvillimeve të tjera strukturore të vendit. Shqipëria po humbet popullsi, pjesa dërrmuese e shërbimeve publike është zhvendosur online, ndërsa papunësia te të rinjtë është rritur ndjeshëm. Në një perspektivë më të gjatë, tkurrja dhe plakja e popullsisë duhet të ndryshojnë edhe nevojat për personel publik, veçanërisht në shërbimet që lidhen drejtpërdrejt me numrin e banorëve.
Në të njëjtën kohë, Shqipëria është ndër vendet që ka digjitalizuar më fort marrëdhënien e qytetarëve me administratën. Komisioni Europian raportonte se 95% e aplikimeve për 1,253 shërbime publike ofroheshin online, ndërsa të dhënat e qeverisë për vitin 2026 flasin për 1,278 shërbime elektronike dhe miliona dokumente e shërbime të gjeneruara pa kontakt fizik me administratën.
Një proces i tillë duhet të ulë nevojën për një pjesë të funksioneve rutinë administrative në sportele, përpunim manual dokumentesh, shkëmbim shkresash dhe procedura që tashmë realizohen automatikisht. Vetë qeveria vlerëson se transformimi digjital ka reduktuar kostot dhe kohën e procedurave administrative.
Buxheti 2026, për shembull, parashikon fonde të shtuara për digjitalizimin dhe sigurinë kibernetike, drejtësinë, mbrojtjen dhe pushtetin vendor dhe një seri ndërmarrjesh që shteti ka hapur në pronësi të tij.
Kontrasti bëhet edhe më i fortë nga zhvillimet në tregun e punës për të rinjtë. Sipas të dhënave të sapo -publikuara nga INSTAT, në tremujorin e dytë 2026 papunësia për grup-moshën 15-29 vjeç arriti në 17.7%, nga 15.1% një vit më parë. Në të njëjtën kohë, papunësia për të gjithë popullsinë aktive ishte vetëm 8.3%.
Teksa sektori shtetëror arrin nivele historikisht të larta punësimi, ekonomia ende ka vështirësi të krijojë mundësi të mjaftueshme për të rinjtë që hyjnë në tregun e punës./ Monitor
