Punimi me eskavator shkaktoi vatër zjarri në ullishte, pronari sulmon mjetin e kompanisë. Arrestohet 29-vjeçari

Një konflikt i nisur pas një zjarri të shkaktuar gjatë punimeve me eskavator ka çuar në arrestimin e një 29-vjeçari dhe procedimin penal të një 50-vjeçari në Tiranë.

Ngjarja është regjistruar në fshatin Kus, ku gjatë punimeve me një mjet eskavator, 50-vjeçari dyshohet se ka këputur një tel të tensionit të mesëm, duke shkaktuar një vatër zjarri.

Flakët janë përhapur në një zonë me shkurre dhe në një ullishte në pronësi të familjes së 29-vjeçarit, duke sjellë më pas përplasje mes palëve.

Sipas policisë, pas dëmtimit të pronës nga zjarri, Ledjan Musteqja dyshohet se ka dëmtuar automjetin e kompanisë që po kryente punimet, si edhe pajisjen GPS të vendosur në eskavator.

Për këtë arsye, blutë kanë arrestuar 29-vjeçarin, ndërsa ndaj 50-vjeçarit është nisur procedim penal në gjendje të lirë.

Materialet procedurale janë referuar në Prokurorinë e Tiranës, e cila do të vijojë hetimet për zbardhjen e plotë të rrethanave dhe përgjegjësive të secilit person të përfshirë në ngjarje.