Qytetari denoncon shërbimin e Finikas Lines: Prenotova biletë me makinë, ma regjistruan si biçikletë dhe nuk më kthejnë paratë

Një qytetar nga Saranda ka bërë publik një rast të pakëndshëm me kompaninë e transportit detar Finikas Lines, duke akuzuar operatorin për keqmenaxhim të prenotimeve online dhe mosrespektim të detyrimeve ndaj klientëve.

Në një mesazh të dërguar në rrjetet sociale, qytetari tregon se në faqen zyrtare të Finikas Lines kreu një prenotim dhe pagoi një biletë për linjën Sarandë – Korfuz për dy të rritur, një fëmijë dhe një automjet. Sipas tij, sistemi i kompanisë e lejonte qartë zgjedhjen e makinës dhe ai vazhdoi pagesën.

“Pas konfirmimit pashë se makina ime ishte regjistruar si biçikletë, megjithëse kisha vendosur edhe targën e saj”, shkruan qytetari. Ai thotë se menjëherë pas zbulimit të problemit ka kontaktuar me kompaninë, ku punonjësit i kanë thënë se “nuk transportojnë makinë”, se website-i është ende në provë dhe i kanë premtuar kthimin e plotë të parave.

Megjithatë, kanë kaluar 7 ditë dhe qytetari raporton se nuk ka marrë asnjë rimbursim. Ai thekson se kompania nuk përgjigjet më as në telefon dhe as në WhatsApp.

“Nuk është në rregull që klientët të trajtohen kështu”, përfundon ai.

Ky rast vjen në një kohë kur linjat detare midis Shqipërisë dhe ishujve grekë regjistrojnë flukse të larta udhëtarësh gjatë sezonit turistik veror. Finikas Lines ende nuk ka dhënë një prononcim zyrtar lidhur me rastin e denoncuar./ Piranjat News