Qytetarët sulmojnë me vezë deputetët në nisje të Kuvendit, policia shoqëron disa protestues

Masat e sigurisë rreth godinës së Parlamentit janë përshkallëzuar ndjeshëm në prag të seancës së sotme plenare dhe protestës së paralajmëruar për në orën 10:00.

Përveç rrethimit të zonës me gardhe metalike, Policia e Shtetit ka instaluar në terren mjete të rënda, përfshirë një autoblindë dhe një autobot uji për shpërndarjen e turmës.

Ky mobilizim i shtuar vjen pas tensioneve dhe incidenteve të regjistruara të martën, duke dëshmuar se autoritetet po përgatiten për çdo skenar të mundshëm përballjeje me qytetarët.

Masat ekstreme synojnë mbajtjen nën kontroll të situatës në një ditë kur seanca parlamentare përkon me thirrjet për tubim masiv kundër klasës politike.