"Rama jepe dorëheqjen"/ Shqiptarët 34 ditë protestë kundër qeverisë, nis marshimi drejt Kryeministrisë

Ka nisur marshimi i protestuesve në ditën e 34-të të protestës qytetare kundër qeverisë së kryeministrit Edi Rama.

Pasi u grumbulluan në Sheshin "Skënderbej", qindra qytetarë kanë nisur lëvizjen drejt godinës së Kryeministrisë, ku pritet të zhvillohet tubimi i përditshëm me fjalime dhe deklarata nga organizatorët.

Protesta vjen një ditë pas përplasjeve të forta para Kuvendit, ku pati përdorim të gazit lotsjellës, spray me piper dhe arrestimin e disa protestuesve.

Teksa marshojnë përgjatë bulevardit "Dëshmorët e Kombit", qytetarët po mbajnë pankarta dhe flamuj kombëtarë, ndërsa dëgjohen thirrjet "Rama ik", "Rama jep dorëheqjen", "Shqipëri e re", "Ju erdhi fundi" dhe "Lironi çunat", kjo e fundit në mbështetje të protestuesve të arrestuar gjatë zhvillimeve të djeshme.

Organizatorët kanë bërë të ditur se protesta do të vijojë sipas skenarit të ditëve të mëparshme, me tubimin para Kryeministrisë, ndërsa kanë ritheksuar se aksioni qytetar do të vazhdojë deri në plotësimin e kërkesës së tyre për largimin e kryeministrit Edi Rama.