Reforma territoriale/ Kryetari socialist i Libohovës del kundër shkrirjes së bashkisë

Kryetari socialist i Bashkisë së Libohovës, Leonard Hide ka reaguar publikisht kundër mundësisë së shkrirjes së bashkisë në kuadër të reformës së re territoriale, duke bërë thirrje për mbrojtjen e identitetit dhe historisë së qytetit.

Përmes një reagimi në rrjetet sociale, Hide thekson se Libohova nuk është thjesht një njësi administrative, por një trashëgimi historike, kulturore dhe identitare që i përket jo vetëm banorëve të saj, por gjithë vendit.

“Ka kauza që nuk kanë nevojë për ushtarë të rastit. Kanë nevojë për besnikëri. Besnikëria nuk është të jesh i pranishëm vetëm kur është e lehtë. Është të qëndrosh edhe kur rruga bëhet e vështirë”, shkruan ai.

Sipas Hides, historia nuk ndërtohet nga ata që zgjedhin heshtjen, por nga ata që mbrojnë atë që besojnë se është e drejtë. Ai nënvizon se një vend nuk jeton vetëm nga kufijtë administrativë, por nga kujtesa, kultura, traditat dhe identiteti i tij.

“Prandaj, çështja nuk është nëse një bashki ekziston në një hartë administrative. Çështja është nëse kemi vullnetin të mbrojmë atë që na ka formuar si komunitet dhe si komb”, shprehet kryebashkiaku.

Galeria fotografike (

)