Henna Virkkunen, nënkryetarja ekzekutive e Komisionit Evropian për sovranitetin e teknologjisë, sigurinë dhe demokracinë, paralajm&eu...
AKTUALITET
Riatdhesimi i 5 shqiptarëve nga Siria, Ambasada e SHBA: Fitore për këto familje dhe për sigurinë globale
PiranjatPërditësimi i fundit 1 Shtator 2026, 11:34
Shtetet e Bashkuara kanë përshëndetur dhe vlerësuar Shqipërinë për operacionin e fundit të riatdhesimit të shtetasve shqiptarë nga Siria. Në Shqipëri janë kthyer pesë shtetas shqiptarë, dy gra dhe tre fëmijë, në kuadër të misionit të realizuar më 26 gusht. Autoritetet shqiptare kanë nisur tashmë procedurat për mbështetjen, rehabilitimin dhe riintegrimin e tyre në shoqëri.
Përmes një reagimi, Ambasada e SHBA-së në Tiranë ka vlerësuar angazhimin e Shqipërisë për kthimin e shtetasve të saj nga zonat e konfliktit në Siri, duke e cilësuar operacionin si një zhvillim pozitiv si për familjet e riatdhesuara, ashtu edhe për sigurinë ndërkombëtare. “Një fitore për këto familje dhe për sigurinë globale”, thuhet në reagimin e cituar nga Ambasada amerikane, e cila vlerëson përpjekjet e Shqipërisë për të garantuar kthimin dhe më pas mbështetjen e shtetasve të saj.
Pas mbërritjes në Shqipëri, pesë të riatdhesuarit do t’i nënshtrohen vlerësimeve shëndetësore dhe psikosociale. Institucionet përgjegjëse do të vijojnë gjithashtu procedurat për akomodimin, rehabilitimin dhe riintegrimin e tyre, sipas nevojave individuale dhe familjare.
Operacioni është realizuar përmes bashkëpunimit të disa institucioneve shqiptare, përfshirë Ministrinë për Evropën dhe Punët e Jashtme, Ministrinë e Brendshme, Policinë e Shtetit dhe strukturat përgjegjëse për parandalimin dhe luftën kundër ekstremizmit të dhunshëm. Sipas autoriteteve shqiptare, ky ishte misioni i gjashtë i riatdhesimit vullnetar nga Siria, ndërsa institucionet kanë deklaruar se puna do të vijojë për kthimin edhe të shtetasve të tjerë shqiptarë që ndodhen ende në zonat e konfliktit, sa herë që të krijohen kushtet për një rikthim të sigurt.
Riatdhesimi i fundit shihet si pjesë e një procesi më të gjerë që synon jo vetëm kthimin fizik të qytetarëve në Shqipëri, por edhe trajtimin e tyre pas mbërritjes, me fokus të veçantë te mbrojtja e fëmijëve dhe riintegrimi i qëndrueshëm në familje dhe komunitet.
