Rikthehen zjarret në Krujë/ Flakët përparojnë drejt depove me lëndë plasëse, ndërhyn helikopteri i ushtrisë

Vatrat e zjarrit janë rikthyer sërish në Krujë, duke përfshirë këtë herë pjesën veriore të zonës së Krastës. Flakët dyshohet se janë përhapur me shpejtësi, të favorizuara nga era e fortë. Sipas raportimeve të qytetarëve, zjarri dyshohet të jetë i qëllimshëm, ndërsa situata është bërë veçanërisht shqetësuese për shkak të afërsisë me depo ku mbahen lëndë plasëse që përdoren për furnizimin e guroreve.

Për shkak të rrezikut, helikopteri i ushtrisë është rikthyer në zonë për të ndihmuar në operacionin e shuarjes së flakëve. Ndërkohë, forcat zjarrfikëse të Krujës kanë krijuar një perimetër sigurie për të penguar përhapjen e zjarrit drejt depove.

Situata mbetet problematike edhe në lagjen Abazaj në Krujë, ku banorët kanë kërkuar ndërhyrjen e shërbimeve për përballimin e flakëve. Banorët pretendojnë se kanë telefonuar për të kërkuar ndihmë, por sipas tyre, ndërhyrja nuk ka qenë në kohën e duhur.

Forcat zjarrfikëse dhe strukturat e tjera në terren vijojnë përpjekjet për izolimin e vatrave, ndërsa era e fortë dhe afërsia me zonat e rrezikshme e bëjnë situatën veçanërisht kritike. Autoritetet po monitorojnë situatën dhe po punojnë për të parandaluar përhapjen e mëtejshme të flakëve.