Rrezikohen disa banesa, situata kritike në fshatin Pocest në Dibër

Një vatër zjarri me përmasa të mëdha ka përfshirë fshatin Pocest, në Njësinë Administrative Maqellarë të Bashkisë Dibër.

Flakët janë përhapur me shpejtësi dhe kanë rrezikuar disa banesa dhe vila pranë zonës së prekur nga zjarri.

Për izolimin dhe shuarjen e flakëve janë angazhuar forcat zjarrfikëse, punonjës të Bashkisë Dibër, si dhe banorë të zonës, të cilët po punojnë për të penguar përhapjen e mëtejshme të zjarrit.

Në vendngjarje ndodhet edhe kryetari i Bashkisë Dibër, Rahim Spahiu, i cili po ndjek nga afër situatën dhe operacionin e ndërhyrjes.

Prej më shumë se dy orësh, ekipet në terren vijojnë përpjekjet për izolimin e vatrës dhe mbrojtjen e banesave. Situata mbetet nën monitorim të vazhdueshëm, ndërsa ndërhyrja për shuarjen e zjarrit vijon.