Finalizohet një operacion antidrogë në Korçë, në kuadër të të cilit janë arrestuar tre persona dhe jan&eum...
AKTUALITET
Rriten çmimet e biletave ajrore nga kriza e karburanteve, dilema për prenotimet verore
PiranjatPërditësimi i fundit 3 Prill 2026, 14:06
Çmimet e biletave ajrore po shënojnë rritje të ndjeshme në prag të sezonit veror, si pasojë e krizës së karburanteve të shkaktuar nga tensionet në Lindjen e Mesme.
Sipas raportimeve ndërkombëtare, konflikti në Iran dhe pasojat në sektorin energjetik, përfshirë kufizimet në furnizim dhe vështirësitë në kalimin përmes ngushticës së Hormuzit, kanë ndikuar drejtpërdrejt në koston e karburantit. Kjo ka sjellë rritje të çmimeve jo vetëm për benzinën dhe gazin, por edhe për industrinë e aviacionit.
Në fluturimet brenda Europës, çmimet janë rritur mesatarisht nga 10% deri në 15% gjatë periudhës së fundit, me një trend të vazhdueshëm në rritje. Për destinacionet e largëta, shtrenjtimi është edhe më i theksuar, pasi kërkohet më shumë karburant dhe disa itinerare janë zgjatur për arsye sigurie, për shkak të shmangies së zonave të konfliktit.
Ndërkohë, kompanitë ajrore po përballen edhe me rritje të kërkesave për rimbursim për shkak të anulimeve apo vonesave të gjata të fluturimeve. Të dhënat tregojnë se këto kërkesa janë rritur ndjeshëm në muajt e fundit, duke reflektuar paqëndrueshmërinë e situatës.
Në këtë kontekst, ekspertët sugjerojnë se rezervimi i hershëm i biletave për verën mund të jetë një zgjedhje e arsyeshme, pasi çmimet pritet të vazhdojnë të rriten në afat të shkurtër. Nga ana tjetër, pritja për një stabilizim të situatës mund të sjellë potencialisht ulje tarifash, por pa një afat të qartë për këtë zhvillim.
Në kushtet e pasigurisë aktuale, vendimi për kohën e prenotimit mbetet një balancë mes rrezikut të rritjes së mëtejshme të çmimeve dhe shpresës për normalizim të tregut.
