Ministria e Drejtësisë ka reaguar lidhur me transferimin e Erion Veliajt nga ambientet e paraburgimit, duke sqaruar se lëvizja drejt Institucioni...
AKTUALITET
Rritja e naftës, Shoqatat e Transportit Urban dhe Interurban: Nesër do të reduktojmë flotën!
PiranjatPërditësimi i fundit 31 August 2026, 10:32
Linjat e transportit publik do të ulin me 20 deri në 30 % numrin e mjeteve në qarkullim. Mësohet se lajmi është bërë me dije nga vetë operatorët e transportit, të cilët deklarojnë se kjo masë vjen si pasojë e drejtpërdrejtë e pamundësisë financiare për të mbuluar kostot e larta të operimit, veçanërisht ato të karburantit.
Sipas operatorëve, operimi me 100% të kapacitetit është bërë i papërballueshëm, ndërsa nëvizojnë se ky vendim nuk vjen si mungesë vullneti, por si e vetmja zgjidhje në kushtet aktuale.
"Për këtë arsye, njoftojmë se duke filluar nga data 01.09.2026, operatorët e transportit publik do të detyrohen të operojnë me një flotë të reduktuar në masën rreth 20–30%, në varësi të kapacitetit financiar dhe operacional që secili operator ka aktualisht në dispozicion.
Masa e reduktimit nuk përbën një zgjedhje të operatorëve dhe as një mungesë vullneti për garantimin e shërbimit normal të transportit publik. Ajo është një pasojë e drejtpërdrejtë e pamundësisë financiare për të mbuluar kostot e operimit me flotë të plotë, sidomos kostot e karburantit, të cilat përbëjnë një nga zërat kryesorë të aktivitetit. Reduktimi i mjeteve në qarkullim pritet të sjellë në mënyrë të pashmangshme ulje të frekuencës së shërbimit, rritje të intervaleve ndërmjet mjeteve, mbingarkesë të mjeteve që do të mbeten në qarkullim dhe vështirësi për qytetarët që përdorin çdo ditë transportin publik.
Në këto kushte, u kërkojmë institucioneve përgjegjëse që të ndërhyjnë me urgjencë, të japin një përgjigje konkrete mbi kërkesat e paraqitura nga operatorët dhe të mundësojnë realizimin e kompensimit të parashikuar për kostot e karburantit, si dhe vijimin e mbështetjes për periudhën në vazhdim.
Operatorët kanë bërë dhe vijojnë të bëjnë çdo përpjekje për të garantuar vazhdimësinë e shërbimit, por në kushtet aktuale financiare operimi me 100% të flotës nuk është më i përballueshëm. Për sa më lart, kërkojmë trajtimin me prioritet dhe urgjencë të kësaj situate, me qëllim shmangien e përkeqësimit të mëtejshëm të shërbimit të transportit publik dhe rikthimin sa më parë të kapacitetit të plotë operacional", thuhet në një njoftim në kërkesën drejtuar Kryeministrisë.
