Një ngjarje e rëndë është regjistruar në fshatin Gështenjas të Pogradecit, ku një elektrist ka humbur jetën ...
AKTUALITET
Saga pa fund e Hekurudhës/ Hapet tenderi i ri 15.7 milionë euro për 4 km
PiranjatPërditësimi i fundit 11 Maj 2026, 22:16
Edhe pse kanë kaluar gati pesë vite nga nisja e punimeve për linjën hekurudhore Tiranë-Durrës me degëzim në Rinas, përfundimi i plotë i këtij projekti duket ende larg horizontit. Kur pritej që gjithçka të ishte drejt finales, Hekurudha Shqiptare ka hapur këtë të hënë një tender të ri me vlerë 15.7 milionë euro për ndërtimin e një zgjatimi prej 4 kilometrash.
Ky projekt i ri synon të lidhë Terminalin e Transportit Publik (PTT) me stacionin e ardhshëm në fund të Bulevardit të Ri të Tiranës, i cili do të shërbejë si stacioni "Qendra e Qytetit". Sipas dokumenteve të tenderit, ky zgjatim është i domosdoshëm për të garantuar një ndërlidhje efikase mes transportit urban dhe atij hekurudhor, duke e bërë linjën më atraktive për qytetarët dhe turistët.
Kompanitë e interesuara kanë afat deri më 15 qershor për të paraqitur ofertat e tyre. Megjithatë, ajo që bie në sy është afati i ekzekutimit: fituesi do të ketë në dispozicion 2 vite për të mbyllur punimet, çka do të thotë se treni në qendër të Tiranës mund të mos shihet para vitit 2028.
Hekurudha Shqiptare argumenton se ky investim do të ndikojë pozitivisht në mjedis dhe ekonomi, duke adresuar sfidat e urbanizimit të shpejtë në kryeqytet:
Ndonëse zyrtarisht raportohet se janë mbyllur 97% e punimeve për linjën kryesore dhe pritet që trenat të "ndizen" në fillim të vitit të ardhshëm, ky zgjatim i ri e lë projektin total pa një datë përfundimtare të prerë.
Nisur nga përvoja e punëve publike në Shqipëri, ky zgjatim prej 4 kilometrash dhe kostoja shtesë prej miliona eurosh tregojnë se "ëndrra hekurudhore" që nisi në vitin 2021 po shndërrohet në një kantier të hapur pa afat, duke lënë qytetarët në pritje të një shërbimi modern që po vjen me ritme tejet të ngadalta.
