Zonat malore në qarkun e Kukësit po përjetojnë kushte klimaterike dimërore, ndonëse jemi ende në fund të muajit tetor.
...
AKTUALITET
Seanca për padinë ndaj Prokurorit, Veliaj: U vunë re zhvillime shqetësuese për shtetin e së drejtës
PiranjatPërditësimi i fundit 9 May 2026, 16:08
Kryebashkiaku i Tiranës, Erion Veliaj ka bërë një reagim në lidhje me seancën e një dite më parë, 8 maj, në Gjykatën Administrative ku u shqyrtua padia e ngritur nga ai kundër emërimit të Ols Dados si Prokuror.
Në një postim në rrjete sociale, Veliaj thekson se “u evidentuan disa zhvillime shqetësuese për standardet e shtetit të së drejtës dhe transparencës së drejtësisë në Shqipëri”.
Sipas kryebashkiakut, edhe pse mediat kishin nisur transmetimin e seancës, gjykata vendosi ndalimin e transmetimit live dhe largimin e kamerave nga salla, duke iu referuar një udhëzimi administrativ të Këshilli i Lartë Gjyqësor. Veliaj e cilëson këtë vendim te gjykatës në kundërshtim me standardet kushtetuese për transparencën e gjykimit.
Ai shkruan se kundër pranisë së mediave u pozicionuan si Ols Dado, ashtu edhe Këshilli i Lartë i Prokurorisë. Sipas tij, argumenti se transmetimi mund të dëmtojë imazhin e një magjistrati tregon pikërisht nevojën për transparencë publike mbi ligjshmërinë e mandatit të tij.
“Në një shtet demokratik, karriera e një prokurori nuk mbrohet duke shmangur kontrollin publik mbi ligjshmërinë e mandatit të tij, por duke provuar publikisht se ai mandat është fituar në përputhje me ligjin. Një mandat i ligjshëm nuk ka frikë nga kamerat dhe një proces i drejtë nuk ka frikë nga publiku.”, thotë ai.
Kryebashkiaku pretendon gjithashtu se gjatë seancës u evidentua një “harmoni shqetësuese institucionale” mes qëndrimeve të KLP-së dhe Prokurorit Dado. Ai deklaron se, sipas provave të paraqitura në gjykatë, KLP nuk ka marrë asnjë vendim kolegjial për çështjet e ngritura prej tij, ndërsa nënkryetari i institucionit dyshohet se ka penguar shqyrtimin e tyre në organin kolegjial.
Veliaj pretendon po ashtu se përfaqësuesja e KLP-së ka tejkaluar autorizimin institucional duke mbajtur qëndrime për çështje mbi të cilat institucioni nuk është shprehur zyrtarisht.
“Nga vetë provat e paraqitura nga përfaqësuesja e KLP rezultoi se ky institucion nuk ka marrë asnjëherë një vendim kolegjial mbi çështjet e ngritura nga Erion Veliaj. Përkundrazi, sipas sa rezultoi në seancë, nënkryetari i institucionit ka penguar dërgimin e çështjes për shqyrtim në organin kolegjial dhe ndërkohë, janë krijuar përshtypje publike sikur ekziston një vendimmarrje e KLP-së, kur në fakt një e tillë nuk rezulton të jetë marrë.”, shton Veliaj.
Më tej, Veliaj thekson se do të vijojë të kërkojë verifikimin e plotë të ligjshmërisë së Dados, duke e konsideruar çështjen të lidhur me besueshmërinë e shtetit të së drejtës dhe integritetin e institucioneve të drejtësisë në Shqipëri.
“Qëndrimi ynë mbetet i pandryshuar: askush nuk bëhet prokuror i Republikës së Shqipërisë përmes heshtjes institucionale, kalimit të kohës apo shmangies së kontrollit publik dhe gjyqësor. Nëse kriteret ligjore nuk janë përmbushur, pavlefshmëria absolute nuk shërohet me kalimin e viteve.”, shprehet ai.
