Mariglen Lalës që iu vendos tritol mëngjesin e sotëm rezulton person me precedente kriminale, i akuzuar dhe burgosur për grabitje.
A...
AKTUALITET
Shaip Kamberi ngre alarmin në parlamentin serb, kërkon hetim për 135 shqiptarët e vrarë në armatën jugosllave
PiranjatPërditësimi i fundit 13 Maj 2026, 22:54
Deputeti shqiptar në Serbi, Shaip Kamberi, ka ngritur alarmin lidhur me rikthimin e shërbimit të detyrueshëm ushtarak në Serbi, duke sjellë në vëmendje, se 135 shqiptarë humbën jetën në rrethana të dyshimta gjatë shërbimit në Armatën Popullore të Jugosllavisë (APJ).
Sipas Kamberit, kujtesa kolektive e shqiptarëve në Luginën e Preshevës dhe Kosovë vazhdon të dominohet nga rastet e ushtarëve shqiptarë që u vranë gjatë viteve ’70 dhe ’80, ndërsa autoritetet jugosllave i klasifikonin ato si “vetëvrasje”, “aksidente” apo “shkelje disipline”.
Ai thekson se familjet e viktimave shpesh raportonin gjurmë dhune në trupat e të rinjve të kthyer nga ushtria, ndërsa mungesa e hetimeve të pavarura dhe transparencës ka shtuar dyshimet për motive etnike dhe politike pas këtyre vrasjeve. Kamberi deklaron se shqiptarët në ish-Jugosllavi përballeshin me diskriminim sistematik brenda ushtrisë, sidomos pas demonstratave të vitit 1981 në Kosovë, kur shqiptarët trajtoheshin si “element separatist” dhe të pabesueshëm për shtetin federativ.
Në reagimin e tij, ai kritikon faktin që Serbia asnjëherë nuk ka pranuar zyrtarisht përgjegjësi për këto raste dhe nuk ka hapur hetime institucionale mbi vdekjet e shqiptarëve në APJ. Sipas tij, arkivat ushtarake vazhdojnë të mbeten të mbyllura, ndërsa tema është lënë jashtë diskursit publik dhe historiografisë serbe.
Për këtë arsye, Kamberi ka propozuar formimin e një Komisioni të posaçëm parlamentar që do të hetojë rastet e vdekjes së 135 shqiptarëve në radhët e APJ-së gjatë viteve ’80.
Ai kërkon që në këtë komision të përfshihen edhe organizata për të drejtat e njeriut, ekspertë të drejtësisë tranzicionale dhe përfaqësues të komunitetit shqiptar. Sipas Kamberit, pa zbardhjen e këtyre rasteve dhe pa ballafaqim serioz me të kaluarën, rikthimi i shërbimit të detyrueshëm ushtarak në Serbi do të vazhdojë të shihet me mosbesim nga shqiptarët e Luginës së Preshevës.
