Sherri në burgun e sigurisë së lartë në Fier, një nga të plagosurit anëtari i grupit të Bajrajve

Zbardhen detaje nga konflikti mes disa të burgosurve i regjistruar në burgun e sigurisë së lartë në Fier, gjatë orarit të ajrimit, duke përfunduar me plagosjen e dy të dënuarve.

Mësohet se në përplasjen e regjistruar janë përfshirë Denis Brajovic (Bajri) dhe Jurgen Zotaj, të cilët kanë mbetur të plagosur.

Burime nga Spitali Rajonal i Fierit dhe Institucioni i Ekzekutimit të Vendimeve Penale bëjnë me dije se dy të dënuarit dyshohet se janë goditur me mjete prerëse të improvizuara.

Pas nisjes së konfliktit, forcat e sigurisë së burgut kanë ndërhyrë menjëherë, duke neutralizuar situatën dhe rikthyer të dënuarit në qelitë e tyre.

Dy të plagosurit janë transportuar në Spitalin Rajonal të Fierit, ku kanë marrë ndihmën mjekësore. Sipas burimeve spitalore, gjendja e tyre është e qëndrueshme dhe ndodhen jashtë rrezikut për jetën.

Ndërkohë, vijojnë verifikimet për të zbardhur shkaqet dhe rrethanat e konfliktit, si dhe për të përcaktuar përgjegjësitë e personave të përfshirë.