Shiu shemb rrugën Kukës-Bushtricë dhe nxjerr zbuluar 1.3 miliardë lekë “mirëmbajtje”, të tenderuara në 2024

Ditën e sotme, pas një shiu në qarkun e Kukësit, u shemb edhe një tjetër rrugë.

Bëhet fjalë për aksin Kukës–Bushtricë, një aks për të cilin vetëm një vit më parë janë shpenzuar shuma të konsiderueshme parash.

Gazetarët investigativë të Piranjave vunë re se ARRSH, në datën 25.06.2024, ka hapur tenderin me objekt “Mirëmbajtje me performancë, rruga ‘Kukës – Bushtricë (Vasije)’”, me gjatësi totale 34 kilometra. Burimi i financimit: Buxheti i Shtetit. Vlera e këtij tenderi është 132,954,064.00 lekë.

Piranjat News zbulojnë se në garë morën pjesë 6 operatorë, por fituese doli kompania Be-SI sh.p.k. Menjëherë, Open Data e sinjalizoi këtë tender me flamur të kuq, për “skualifikimin e të gjithë operatorëve konkurrues, përveç fituesit / skualifikim i ofertës me vlerën më të ulët”.

Më tej, në detajet e tenderit, rezulton se 1 miliard e 300 milionë lekë do të përdoren për 48 muaj, sa zgjat kontrata, dhe vetëm për 34 kilometra rrugë.

Ndërkohë Piranjat News konstatojnë se drejtori aktual i Përgjithshëm, Gentian Gjyli, ka firmosur këtë tender, ndërkohë që sot kemi një aks ku shkëmbinjtë kanë pushtuar asfaltin.

Be-SI sh.p.k. është një kompani që ka si objekt studim, projektim, ndërtim dhe konstruksione të ndryshme, me administrator Mustafa Islamaj dhe aksioner Hamz Islamaj.

Rikonstruksioni i rrugës, e cila sot ka pësuar shembje masive me gurë, është vërejtur edhe në një tjetër tender të vitit 2021, për fshatin Marqinet, me objekt “Sistemimi, asfaltimi i rrugëve ‘Kodra e Miut’ dhe rindërtimi i fshatit 2 Marqinet”.Ky tender ka rënë në vëmendjen e KLSH-së, pasi diferenca në vëllimin e punimeve të deklaruara si të kryera rezultoi problematike.

Ndërkohë, autoriteti mbikëqyrës konstatoi pasaktësi në verifikimin e zbatimit të projekt-buxhetit.

Si rezultat i këtyre mangësive, kontraktori i punimeve përfitoi padrejtësisht.

Pas çdo shiu të rënë, vjen një shembje rruge dhe, bashkë me të, shembja e një investimi prej miliarda lekësh./Piranjat News