Shkeli perimetrin e sigurisë, Policia Kufitare gjobit drejtuesin e mjetit lundrues në Ksamil

Një mjet lundrues është bllokuar ditën e sotme nga policia pasi u filmua duke lundruar brenda hapësirës së rezervuar për pushuesit.

Pas denoncimit të rastit nga qytetarët Policia Kufitare bëri të mundur identifikimin e drejtuesit të mjetit si dhe bllokimin e mjetit lundrues tip gomone, ndërsa sakaq ky i fundit u ndëshkua me një gjobë 500.000 lekë të rinj.

Policia Kufitare u bënë thirrje të rinjvë të zbatojnë rregulloren e vendosur, teksa kontrollet gjatë vijës begdetare vazhdojnë me synim garantimin e sigurisë për të gjithë pushuesit.

Njoftimi i Policisë:

Ksamil/ Shkeli me gomone perimetrin e sigurisë detare, në zonën e Gjirit të Hartës, në Ksamil, duke lundruar brenda hapësirës së rezervuar për pushuesit, me rrezik të drejtpërdrejtë për jetën dhe sigurinë e tyre, por u filmua nga qytetarët dhe u denoncua menjëherë në Policinë e Shtetit.

Reagimi i menjëhershëm i Policisë Kufitare dhe i Njësisë Policore Detare çoi në identifikimin e drejtuesit, bllokimin e mjetit lundrues tip gomone dhe ndëshkimin e drejtuesit të tij me gjobë 500.000 lekë të rinj. Policia Kufitare u bën thirrje të gjithë drejtuesve të mjeteve lundruese të respektojnë me rigorozitet perimetrin e sigurisë së plazheve dhe rregullat e lundrimit. Çdo shkelje që cenon jetën dhe sigurinë e pushuesve do të konstatohet dhe do të ndëshkohet me masat e parashikuara nga legjislacioni në fuqi.

Shërbimet e Policisë Kufitare vijojnë kontrollet intensive në të gjitha zonat bregdetare, me synim garantimin e sigurisë së pushuesve gjatë sezonit turistik. Policia e Shtetit falënderon qytetarët dhe pushuesit për bashkëpunimin dhe denoncimet e tyre, të cilat mundësojnë reagim të shpejtë ndaj çdo shkeljeje që rrezikon jetën dhe sigurinë në plazhe.