Shqiptari dhe shoku i vjedhin të moshuarit 50 mijë euro. Si i tradhtoi një tatuazh

Një tatuazh i dukshëm në qafë ka ngjallur dyshime te një i moshuar dhe ka kontribuar në zbulimin e një mashtrimi. Karabinierët kanë arrestuar një 39-vjeçar vendas dhe një 26-vjeçar shqiptar, të dy banues në zonat mes provincave të Napolit dhe Kazertës, të dyshuar si përgjegjës për dy mashtrime ndaj të moshuarve dhe një grabitje.

Ngjarja e parë ka pasur në shënjestër një 86-vjeçar, i cili ishte telefonuar nga një person që ishte prezantuar si një karabinier me gradën e marshallit. I moshuari ishte bindur të mblidhte arin dhe sendet e tij me vlerë, me pretendimin se duhej t’ia dorëzonte një personi që do të shkonte në banesën e tij.

Kur 39-vjeçari u paraqit në shtëpi, i moshuari vuri re tatuazhin në qafën e tij dhe i kërkoi të tregonte dokumentin identifikues. Në këtë moment, burri dyshohet se e ka shtyrë të moshuarin dhe i ka rrëmbyer një qese me sende të çmuara, me vlerë rreth 50 mijë euro.

Gjatë arratisjes, pasi u pikas nga fqinjët, i dyshuari e ka braktisur plaçkën, e cila më pas u gjet dhe iu kthye pronarit.

Pak më herët, një tjetër e moshuar, 83 vjeçe, ishte mashtruar me një skenar të ngjashëm. Në këtë rast, grabitja përfshinte bizhuteri dhe tre orë, me një vlerë totale prej rreth 7 mijë eurosh. Sendet e çmuara u gjetën nga efektivët brenda automjetit të të dyshuarve. Më 2 shtator, arrestimi u konfirmua nga gjykata. Për 39-vjeçarin u vendos masa e paraburgimit në burg, ndërsa për 26-vjeçarin shqiptar u caktua masa e “arrestit në shtëpi”. /PiranjatNews/