Shqiptari i nxjerr syrin grekut pas sherrit!

Policia greke në Volos ka arrestuar një 27-vjeçar shqiptar, i cili akuzohet për plagosjen e rëndë të një shtetasi vendas pas një sherri. Ngjarja ndodhi pas një debati të ashpër, ku i riu dyshohet se e qëlloi kundërshtarin në sy me një pistoletë ajrore, duke i shkaktuar dëmtime serioze. I plagosuri u transportua në spital, ku ndodhet nën kujdesin e mjekëve.

Sipas mediave greke, autori u lokalizua dhe u arrestua gjatë orëve të natës nga policia, teksa lëvizte me automjet. Gjatë kontrollit në makinë, efektivët gjetën dhe sekuestruan një kartëmonedhë 50 euro të dyshuar si e falsifikuar, çka çoi edhe në ngritjen e një tjetër akuze ndaj tij për qarkullim parash të falsifikuara.

Kontrollet vijuan edhe në banesën e 27-vjeçarit, ku policia zbuloi një arsenal armësh të ftohta, përfshirë 9 thika, si dhe një sasi të vogël lënde narkotike kanabis. Autoritetet bëjnë me dije se i arrestuari do të dalë përpara prokurorisë së Volosit, ndërsa hetimet për zbardhjen e plotë të ngjarjes vijojnë.