“Është gjetur Bleona Mata”, deklarata që tronditi opinionin/ Avokati i familjes: Gënjeshtër dhe mashtrim i madh

Një deklaratë e bujshme për fatin e Bleona Matës ka rikthyer në vëmendje një prej rasteve më të mistershme të zhdukjes së një fëmije në Shqipëri. Avokati Alban Duraj deklaroi se Bleona Mata është gjetur dhe se ajo jeton në një vend të Bashkimit Europian, së bashku me prindërit e saj adoptues, një çift grek.

Por kjo deklaratë është hedhur poshtë kategorikisht nga avokati i familjes Mata, Idajet Beqiri. Beqiri e cilësoi deklaratën të papërgjegjshme dhe tha se Duraj nuk ka asnjë lidhje me çështjen e Bleonës.

“Jo vetëm që është e papërgjegjshme, por krijon probleme ligjore, e hedh organin e akuzës në një drejtim që nuk duhet të shkojë. Gjithashtu ka probleme të rënda me familjen, nënën e Bleonës, njerëzit e tjerë të dashur, vëllain e saj. Ua ngacmon plagën padrejtësisht. Ky person nuk ka lidhje, nuk e di pse është futur këtu”, u shpreh Beqiri.

Sa i takon nënës së Bleonës, Bukurie Mata, avokati tha se ajo është përballur ndër vite me teori dhe pretendime të shumta për fatin e vajzës së saj.

“Dikush thotë është martuar këtu, dikush e gjetëm këtu, dikush thotë është adoptuar. Ka plot teori. Me dhimbje i pret të gjitha, edhe këtë deklaratë, por e di që është një gënjeshtër, mashtrim i madh”, tha ai.

I pyetur nëse ka ndonjë informacion lidhur me vajzën që pretendohet se është gjetur, Beqiri e cilësoi deklaratën e avokatit Duraj si një “sajesë të turpshme”.

“Madje është vepër penale. Nuk dua të flas shumë për të, komuniteti ynë ka lloj-lloj njerëzish. U bë vetting gjithandej, por duhet bërë dhe brenda avokatëve. Çfarë nuk po dëgjojmë”, vijoi avokati.

Sipas Beqirit, hetimet për zhdukjen e Bleona Matës janë duke u zhvilluar në një tjetër drejtim dhe deklarata të tilla rrezikojnë të shpërqendrojnë vëmendjen nga puna e autoriteteve.

Për familjen Mata, pas më shumë se një dekade nga zhdukja e Bleonës, çdo pretendim i pakonfirmuar për vendndodhjen e saj rikthen dhimbjen dhe pasigurinë. Ndërkohë, mbetet për t'u verifikuar nëse deklarata e avokatit Alban Duraj mbështetet në ndonjë informacion konkret apo në prova të reja lidhur me çështjen.