Një aksident rrugor është regjistruar mëngjesin e sotëm në Kukës, në vendin e quajtur “Lugina e Drinit të Zi&...
AKTUALITET
Shtetëzimet e kota të koncesioneve/ Ish-drejtori i sterilizimit Artan Lleshi po fiton miliona euro pa asnjë garë!
PiranjatPërditësimi i fundit 20 August 2026, 21:58
Një individ që deri dje drejtonte kompaninë që kishte fituar koncesionin e sterilizimit në shëndetësi, e cila prodhoi një dosje për Prokurorinë e Posaçme, ku disa drejtues të ministrisë së Shëndetësisë janë vënë nën akuzë, po vijon të marrë sërish miliona euro për të njëjta shërbime. Artan Lleshi ka drejtuar për një kohë të gjatë firmën koncesionare “Sani Service”, ndërsa më vonë themeloi kompaninë “Game Service”, ku fillimisht mori para’ nga koncesionari dhe aktualisht pas shtetëzimit po vijon të marrë të njëjta shuma nga firma shtetërore.
Një rreth vicioz që vijon të gllabërojë para publike, ku pavarësisht se kishte një hetim dhe aktualisht po gjykohen disa persona, sërish të njëjta shuma po kanalizohen te të njëjtat duar, te të njëjtët individë, të cilët njihen botërisht si prestanome e zyrtarëve shtetërorë, apo të disa oligarkëve në shëndetësi. Me këto veprime, organet ligjbërëse apo ato ligjzbatuese, veçse kanë bërë vetëm një “vrimë në ujë”, pasi nuk kanë arritur që të gjejnë shkaktarët e vërtetë e koncesioneve të kota dhe abuzive.
Nëse do ta shtetëzosh këtë shërbim, do të thotë që “punët” të bëhen nga punonjës shtetërorë, të ketë transparencë për paratë publike, apo të mos shkojnë te të njëjtat duar që e bënë këtë shërbim tepër abuziv. Aq më tepër që pas shtetëzimit, paratë po hidhen “lumë”, më shumë sesa merrte firma koncesionare, pa asnjë garë dhe me negocime midis firmës shtetërore OSHIS dhe firmave!
Në datën 14 gusht 2026, OSHIS ka finalizuar tenderin e radhës, ku fitues është kompania GAMASERVICE, me adresë në Kashar, autostrada Tiranë-Durrës në Mëzez. Tenderi ka një objekt të shkurtër të kontratës “shërbim rezervë (Back-Up) për sigurimin e vazhdimësisë së transportit të seteve dhe materialeve të konsumit sterile dhe jo sterile, transportit të mbetjeve të rrezikshme spitalore që krijohen nga seti i personalizuar, në pamundësi të përkohshme të ‘OSHIS’ sha”.
“Me anë të këtij formulari bëjmë me dije se, në këtë procedurë ka marrë pjesë GAMASERVICE, me vlerë 154.582.411 lekë. Nga pjesëmarrësit nuk ka të skualifikuar”, thuhet në dokumente. Pra, në këtë tender ka pasur vetëm një ofertues, kompania e ish drejtorit të firmës koncesionare, e cila ka ofruar rreth 97 % të fondit limit të kësaj procedure, duke lënë pas vetëm 50 mijë euro.
Vox News ka denoncuar edhe në të kaluarën se firma “GAMESERVICE” ka fituar tendera edhe në të kaluarën nga Operatori i Shërbimit të Integruara të Sterilizimit, i cili nuk ka bërë procedurë normale, ku firmat të merrnin pjesë dhe të bënin oferta, por ka negociuar me këtë firmë.
Pronar i kësaj kompanie është z. Artan Lleshi, i cili më parë ka qenë një nga drejtorët më të mëdhenj të kompanisë “Sani Service”, e cila për 10 vite me radhë arkëtoi miliona euro nga buxheti i shtetit dhe nxori bilance negative. Vox News ka mësuar se emri i pronarit të kompanisë që fitoi këtë tender, Artan Lleshi, figuron edhe në dosjen e Prokurorisë së Posaçme, që ka dërguar në gjykatë, ku nën akuzë është ish-ministri Ilir Beqaj dhe Klodjan dhe Ilir Rrapaj.
Mësohet se, Lleshi ka qenë një nga shokët e zyrtarëve shtetërorë që janë nën akuzë, madje shok kase edhe me Ilir Rrapajn, në vitin 1994. Lleshi, sipas SPAK-ut, është drejtor në kompaninë koncesionare “Sani Service” që nga krijimi i saj. Prokuroria ka faktuar se, midis firmës koncesionare dhe “Gameservice” janë bërë transaksione në periudhën prill 2020 dhe dhjetor 2021. Ironia e fatit qëndron se, Lleshi ka fituar para’ si nga kompania koncesionare ashtu edhe nga ajo shtetërore e sterilizimit, duke faktuar se paratë vijojnë të shkojnë te të njëjtat duar. /VOXNEWS/
