16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
Si po mashtron INSTAT? Pyjet digjen, por në statistika nuk humbet asnjë hektar që nga viti 2024
PiranjatPërditësimi i fundit 9 September 2026, 12:38
Sipas të dhënave të publikuara nga INSTAT për vitin 2025, fondi pyjor dhe kullosor i Shqipërisë është 1.731.891 hektarë, ose 60.2% e territorit të vendit. Shifra, sipas INSTAT, ka mbetur e pandryshuar krahasuar me vitin 2024.
Edhe më tej: 1.146.723 hektarë klasifikohen si pyje, ndërsa pjesa tjetër përfshin kullota, livadhe dhe sipërfaqe me bimësi pyjore e joproduktive. Edhe vëllimi i përgjithshëm i pyjeve raportohet në 53 milionë m³.
Por këtu lind pyetja që kërkon përgjigje:
Si është e mundur që sipërfaqja e pyjeve të mos ndryshojë, kur çdo vit Shqipëria humbet mijëra hektarë pyje nga zjarret dhe prerjet, ndërsa mbjellja e sipërfaqeve të reja nuk duket se e kompenson këtë humbje?
Nëse një pyll digjet, sipërfaqja e tij si tokë mund të mbetet në hartë, por a mund të quhet ende e njëjta sipërfaqe pyjore?
Dhe sot, kur teknologjia ka sjellë satelitët, imazhet ajrore dhe dronët, pyetja bëhet edhe më e thjeshtë:
A nuk maten dot realisht ndryshimet në sipërfaqet pyjore të Shqipërisë?
INSTAT thotë se në vitin 2025 gjithçka ka mbetur thuajse në vend: 1.731.891 hektarë fond pyjor dhe kullosor, pa ndryshim nga një vit më parë.
Ndërkohë, pyjet vazhdojnë të digjen.
Atëherë, çfarë po matet realisht?
Sepse nëse pylli digjet, por statistika nuk ndryshon, problemi mund të mos jetë vetëm te pyjet, por te mënyra se si numërohen dhe raportohen më pas.
Nëse sipërfaqja e pyjeve rezulton e pandryshuar, pavarësisht zjarreve dhe humbjes së vazhdueshme të masiveve pyjore, atëherë pikëpyetja bie mbi metodën e matjes dhe mënyrën e përllogaritjes së të dhënave. Një statistikë që nuk reflekton ndryshimet e dukshme në terren, nuk mund të jetë një pasqyrë e saktë e gjendjes së pyjeve në Shqipëri./Piranjat News
