Situata alarmante në Lundre, zjarri po avancon drejt Shkopetit

Situata në fshatin Lundre paraqitet shumë e agravuar dhe me rrezik të shtuar. Zjarri ka dalë nga territori i Lundresë, ka përfshirë edhe territorin e fshatit Madhesh dhe po avancon në drejtim të Shkopetit. Era e fortë po favorizon përhapjen e flakëve, duke e bërë situatën gjithnjë e më të vështirë për t’u kontrolluar.

Rreziku është konkret edhe për një banesë ku aktualisht janë të stacionuara forcat që po angazhohen në përballimin e situatës. Për këtë arsye, kërkohet vlerësim i menjëhershëm i sigurisë së personelit dhe i banesës.

Ndërkohë, në majën e malit Trodhen, zjarri ka avancuar në drejtim të staneve. Për shkak të rrezikut të drejtpërdrejtë, është kërkuar largimi i personave nga zona, si masë paraprake për mbrojtjen e jetës, raporton gazetari Enver Doçi.

Situata kërkon ndërhyrje të menjëhershme, të koordinuar dhe me të gjitha kapacitetet në dispozicion. Në kushtet kur terreni është i vështirë dhe era po ndihmon përhapjen e flakëve, ndërhyrja nga ajri është tashmë e domosdoshme për të frenuar avancimin e zjarrit dhe për të shmangur rrezikimin e banesave, njerëzve dhe staneve.

Çdo vonesë në ndërhyrje mund ta bëjë situatën edhe më të vështirë për t’u kontrolluar.