Policia ka kryer një kontroll në shtëpinë e Albert Sylajt, i dyshuar për vrasjen e Arlinda Zekajt, ku ka gjetur dhe konfiskuar armë...
AKTUALITET
Situatë e rënduar në Gjirokastër, evakuohen familje në “Manalat”, probleme serioze në rrugën e Zagorisë
PiranjatPërditësimi i fundit 7 January 2026, 17:44
Reshjet e dendura të shiut që kanë përfshirë jugun e vendit kanë krijuar situata të vështirë në Qarkun e Gjirokastrës pasditen e sotme (7 janar 2026).
Prefekti i Qarkut ka bërë të ditur përmes një raporti zyrtar të orës 16:00 se është dashur ndërhyrja për evakuimin e banorëve në zonat e rrezikuara të qytetit, ndërsa disa akse rurale janë bllokuar.
Evakuime në lagjen muzeale
Pika më kritike në qytetin e Gjirokastrës paraqitet në lagjen karakteristike “Manalat”, pranë shkollës “Naim Frashëri”. Për shkak të rrezikut nga rrëshqitjet apo dëmtimet e banesave nga uji, Bashkia ka kërkuar dhe realizuar evakuimin e disa familjeve. Banorët janë larguar nga shtëpitë e tyre dhe aktualisht janë strehuar pranë të afërmve, në pritje të qetësimit të situatës.
Bllokim total në Zagori, probleme me dritat
Ndërsa qendra e Libohovës paraqitet e qetë, situata është krejt tjetër në zonën e thellë malore të Zagorisë. Raportohet se aksi që lidh Çajupin me Sheperin është bërë i pakalueshëm për shkak të rrëshqitjeve masive të dherave. Fshatrat Topovë dhe Zhej rezultojnë aktualisht të bllokuar. Përveç izolimit rrugor, banorët e Zagorisë po përballen edhe me mungesën e energjisë elektrike për shkak të defekteve në rrjet.
