Një zjarr shpërtheu pasditen e së dielës, 26 korrik në një zonë me bimësi të ulët në jug të Pylaia...
AKTUALITET
Skandal/ 140 milionë euro për rrugën Kardhiq–Delvinë, uji depërton brenda tunelit të Skerficës
Nga Xhuljan FerzajPërditësimi i fundit 20 Prill 2026, 12:13
Tuneli i Skerficës, pjesë e rrugës Kardhiq–Delvinë, po kthehet në një tjetër shembull problematikash në investimet publike, pasi uji ka depërtuar në brendësi të tij vetëm pak kohë pas përfundimit, duke rrezikuar kështu jetën e kalimtarëve.
Në disa segmente të tunelit vërehen rrjedhje të vazhdueshme uji, që jo vetëm vështirësojnë qarkullimin, por ngrenë dyshime serioze mbi standardet e ndërtimit, ndërsa autoritetet mbeten përgjegjëse për monitorimin dhe mirëmbajtjen e veprave të tilla infrastrukturore.
Tuneli u prezantua me bujë nga qeveria si një investim strategjik, pjesë e aksit Kardhiq–Delvinë, me synimin për të lidhur më shpejt zonat e brendshme me bregdetin dhe për të përmirësuar infrastrukturën rrugore të jugut.
Vlera e tunelit të Skerficës llogaritet në dhjetëra milionë euro dhe përbën një nga elementet më të kushtueshme të aksit Kardhiq–Delvinë.
Kostoja e ndërtimit të kësaj rruge ka kaluar nga një vlerësim fillestar prej 50–60 milionë euro në afro 140 milionë euro deri në përfundimin e saj në vitin 2022.
Ky segment rrugor, me një gjatësi prej rreth 33 kilometrash, përfshin edhe tunelin e Skerficës dhe është ndërtuar në disa lote, ku secili ka përfituar shtesa kontrate deri në 20% të vlerës fillestare.
Ndërkohë, problematikat në këtë aks nuk kanë munguar. Gjatë reshjeve janë konstatuar rrëshqitje dheu në disa pjesë të rrugës, duke ngritur shqetësime për sigurinë dhe qëndrueshmërinë e punimeve. Po ashtu, vihet re mungesa e një grupi emergjence pranë tunelit, çka shton rrezikun në raste aksidentesh për të gjithë kalimtarët.
Janë paguar 150 mijë euro për supervizimin e tunelit. Loti 7, apo ndërtimi i tunelit të rrugës Kardhiq–Delvinë, ka kushtuar 17 milionë euro pa TVSH, apo rreth 21 milionë euro me TVSH./Piranjat News
