Skandal në Berat: Fshati vetëm 2 km nga qyteti i zhytur në baltë, banorët paguajnë vetë për rrugën e lënë përgjysmë

Një qytetar ka ngritur shqetësimin për gjendjen e rënduar të infrastrukturës në fshatin Memias, vetëm rreth 2 kilometra larg qendrës së qytetit të Beratit.

Sipas denoncimit, rruga që lidh fshatin me qytetin vijon të jetë në kushte të papërshtatshme, duke u krahasuar me rrugët e zonave më të thella rurale. Edhe pse banorët janë detyruar të kontribuojnë financiarisht nga xhepi i tyre për asfaltimin, punimet janë lënë përgjysmë dhe nuk janë përfunduar.

Qytetari thekson se në disa raste asfaltimi është kryer vetëm deri pranë banesave të individëve të caktuar, ndërsa pjesa tjetër e fshatit mbetet në baltë, duke krijuar vështirësi të përditshme për banorët.

Një nga shqetësimet më të mëdha lidhet me fëmijët, të cilët detyrohen të shkojnë në shkollë në kushte të vështira, sidomos gjatë ditëve me shi, kur rruga bëhet e pakalueshme.

Gjithashtu, në denoncim ngrihet edhe çështja e turizmit, pasi zona konsiderohet me potencial për zhvillim, por mungesa e infrastrukturës pengon vizitorët dhe dëmton imazhin e fshatit.

“Duam të promovojmë fshatrat turistikë, por pa rrugë kjo është e pamundur,” shprehet qytetari, duke i bërë thirrje Bashkisë së Beratit që të ndërhyjë dhe të përfundojë punimet.

Nga pamjet e siguruara, sipas denoncuesit, shihet qartë gjendja e amortizuar e rrugës, me segmente të mbuluara nga balta dhe pa asfalt, çka vështirëson lëvizjen e banorëve dhe mjeteve./Piranjat News