Skandal në urgjencën e Fierit/ Qytetari denoncon: Ambulanca pa pajisje, mure me lagështi dhe papastërti kudo

Një tjetër qytetar ka ngritur alarmin për gjendjen e rëndë në urgjencën e spitalit të Fierit, duke e cilësuar situatën alarmuese për shëndetësinë.

Në një video të mbërritur në redaksinë e Piranjave, qytetari tregon kushtet shqetësuese brenda ambienteve spitalore, ku duken qartë mure të dëmtuara, me lagështirë dhe mungesë higjiene.

Sipas denoncuesit, problematikat nuk ndalen vetëm te infrastruktura. Ai thekson se edhe ambulancat janë në gjendje të papranueshme, pa pajisjet e nevojshme për të ofruar ndihmën e parë. Në mesazhin e tij, qytetari shprehet se ambulanca i ngjan më shumë një mjeti transporti të zakonshëm sesa një njësie të specializuar për emergjenca mjekësore.

“Nga urgjenca e Fierit, një katastrofë për shëndetësinë. Ambulanca pa asnjë pajisje të duhur, si të ishte një furgon që transporton punëtorë. Asnjë lloj shërbimi në urgjencën e Fierit”, thuhet në denoncim.

Ky është rasti i radhës që denoncon gjendjen në institucionet shëndetësore në vend, duke ngritur pikëpyetje serioze mbi kushtet dhe cilësinë e shërbimit për pacientët./Piranjat News