SPAK mbyll hetimet për dosjen “Metamorfoza”, çështja dërgohet në GJKKO

SPAK ka përfunduar hetimet për fraksionin e ndarë të dosjes “Metamorfoza”, që përfshin nëntë të pandehur, dhe ia ka dërguar çështjen Gjykatës së Posaçme kundër Korrupsionit dhe Krimit të Organizuar (GJKKO) për veprime të mëtejshme.

Mes të pandehurve janë Ervis Martinaj, Denis Bajri, Klaodor Hakaj, Prekë Kodra, Aleks Ndreka, Bardhyl Mavraj, Eljon Hato, Arsad Bashli dhe Nuredin Dumani. Sipas SPAK, disa prej tyre vijojnë të hetohen në mungesë, pasi masat e sigurisë të vendosura ndaj tyre nuk janë ekzekutuar prej vitesh.

Të pandehurit akuzohen për vepra të rënda penale, mes tyre vrasje me paramendim në kuadër të grupit të strukturuar kriminal, pjesëmarrje në organizatë kriminale, sigurim mjetesh për kryerjen e vrasjeve, si dhe armëmbajtje pa leje. Pas mbylljes së hetimeve, dosja do t’i nënshtrohet shortit në GJKKO për caktimin e gjyqtarit që do të vendosë nëse çështja do të kalojë për gjykim.