Stuhia në Sarandë/ Era e fortë shkatërron çatinë e një pallati 12-katësh, 4 familje mbeten në qiell të hapur

Stuhia e fortë që përfshiu Sarandën mbrëmjen e së martës shkaktoi dëme të konsiderueshme në një pallat 12-katësh, ku era e fuqishme shkatërroi çatinë e katit të fundit, të ndërtuar me konstruksion druri.

Si pasojë e dëmtimit, katër familje që banojnë në katin e 12-të kanë mbetur pa mbulesë, duke u përballur me vështirësi pas motit të keq.

Gjatë verifikimeve në terren u konstatua se rreth gjysma e çatisë ishte shkatërruar plotësisht, ndërsa pjesa tjetër kishte pësuar dëmtime të rënda.

Objekti rezulton të jetë një ndërtim i hershëm, ndërsa autoritetet po shqyrtojnë situatën për të përcaktuar hapat që do të ndërmerren për rehabilitimin e dëmeve dhe mbështetjen e banorëve.