Task-Forca e APR në terren në mbështetje të operacioneve për shuarjen e zjarreve

Përballë situatës së zjarreve në territorin e Tiranës, Agjencia e Parqeve dhe Rekreacionit (APR) ka mobilizuar Task-Forcën dhe strukturat e saj në terren, në mbështetje të operacioneve të shuarjes dhe kontrollit të vatrave aktive.

Në bashkëpunim me Drejtorinë e Pyjeve dhe Kullotave, ekipet e APR janë të angazhuara në zonën e Gurrës, në Njësinë Administrative Petrelë, ku po asistojnë forcat zjarrfikëse në përballimin e situatës dhe në përpjekjet për të kufizuar përhapjen e flakëve.

Me autobote dhe mjete të tjera të posaçme, po sigurohet furnizimi me ujë dhe mbështetja logjistike e nevojshme për vijimin e ndërhyrjes në terren. Angazhimi po zhvillohet në koordinim të vazhdueshëm me strukturat zjarrfikëse, Emergjencat Civile dhe strukturat e njësive administrative.

Terreni i vështirë, shtrirja e vatrave dhe kushtet e favorshme për përhapjen e zjarrit e bëjnë ndërhyrjen veçanërisht sfiduese. Për këtë arsye, çdo kapacitet njerëzor dhe logjistik i disponueshëm po vihet në funksion të kontrollit të situatës dhe mbrojtjes së sipërfaqeve pyjore, mjedisit dhe zonave të banuara.

Task-Forca e APR vijon të jetë në gatishmëri të plotë dhe do të qëndrojë në terren për aq kohë sa do të jetë e nevojshme, në mbështetje të strukturave përgjegjëse për menaxhimin e situatës.

Galeria fotografike (

)